თავს როგორ გრძნობთ კლასიკომდე ერთი დღით ადრე?

მოუთმენლად ველი. თითოეულ ფეხბურთელს სურს, რომ ეს შეხვედრა, რაც შეიძლება მალე დაიწყოს. მატჩის დაწყებამდე არც თუ ისე დიდი დროა, მაგრამ ამ შემთხვევაში დრო ნელა გადის.

ეს იქნება თქვენი პირველი კლასიკო "სანტიაგო ბერნაბეუზე", ადრე სად ადევნებდით ამ თამაშს თვალყურს?

მე შეხვედრას ოჯახის წევრებთან ერთად ვუყურებდი. ესაა მატჩი, რომლის დროსაც ისე გეჩვენება, რომ დრო ჩერდება და მასთან ერთად ესპანეთშიც სხვა არაფერი არ ხდება. ეს ასეა, როგორც წესი, მაგრამ ამ წელს გამორჩეულად, ვინაიდან კლუბებს თანაბარი ქულები აქვთ და შესაბამისად დაძაბულობაც უფრო დიდია. ასევე წინ კიდევ სხვა შეხვედრებიცაა სათამაშოდ დარჩენილი. არცერთ კლუბს არ სურს წაგება. ჩვენ გვინდა, რომ კარგი თამაშის დამსახურებით მოვიგოთ.

ფიქრობთ თუ არა, რომ "სანტიაგო ბერნაბეუ" მე–12 მაყურებლის როლში იქნება?

დიახ. მათი მხარდაჭერა აუცილებელია. ჩვენი მხრივ, კი ყველაფერი უნდა გავაკეთოთ იმისთვვის, რომ მათი აპლოდისმენტების ღირსები გავხდეთ. უნდა ვითამაშოთ ძალიან სანახაობრივად, რათა მათ დაინახონ, რომ ძალიან კონცენტრირებულნი ვართ. ჩვენი გულშემატკივრები მხარში დაგვიდგებიან , მაგრამ ჩვენც უნდა გავაკეთოთ რამე იმისთვის, რომ მათ ამის საშუალება მივსცეთ.

რას ფიქრობთ თვით ამ შეხვედრაზე? იქნება თუ არა ის გადამწყვეტი ლა ლიგის მოსაგებად?

ერთადერთი, რაზეც ეხლა ვფიქრობთ, არის მოედანზე გასატარებელი 90 წუთი, სამი ქულა და ჩვენსა და "ბარსელონას" შორის სხვაობის გაზრდა. კლასიკო არაა გადამწვეტი, ვინაიდან წინ კიდევ ექვსი შეხვედრაა ჩასატარებელი.

ხართ თუ არა ფავორიტები იმის გამო, რომ სახლში თამაშობთ?

ფავორიტი მოედანზე გამოჩნდება. ბევრი ამბობდა, რომ პირველ წრეში გამარათული კლასიკოს დროს, ჩვენ ბევრ გოლს გაგვიტანდნენ, მაგრამ ასე არ მოხდა, ის შეხვედრა საკმაოდ მოკრძალებული ანგარიშით დავთმეთ. ჩვენ სახლში ვთამაშობთ, შესაბამისად ყველაფერს გავაკეთებთ მოგებისა და სამი ქულის მოსაპოვებლად, მიუხედავად იმისა, თუ ვინ იქნება ჩვენი მოწინააღმდეგე. "ბარსელონა" ძლიერი მეტოქეა. პირველ რიგში საკუთარი თავი უნდა დავარწმუნოთ, რომ მოგება შეგვიძლია.

როგორ აპირებთ მესის გაჩერებას?

როცა ის ერთი–ერთზე გამოდის, მაშინ მისი გაჩერება ძალიან ძნელია. მის გასაჩერებლად რამე განსაკუთრებულ მეთოდს უნდა ფლობდე. ყველა ფეხბურთელს სჭირდება, რომ უკან დატოვებულ სივრცეს ვინმე აზღვევდეს. ის ძალიან სახიფათოა, როცა მას სამუშაოდ სივრცეს აძლევენ, ამის მიზეზი კი მისი სისწრაფეა. ის ძალიან სწრაფად მოძრაობს ბურთთან ერთად. არ აქვს მნიშვნელობა სად მიიღებს ბურთს, ის ყველა პოზიციაზე ძალიან სახიფათოდ თამაშობს.

არის თუ არა "ბარსელონა" ერთ ფეხბურთელზე დმაოკიდებული?

ჩვენ მარტო მესიზე ფოკუსირება არაფერს მოგვცემს, ვინაიდან "ბარსელონაში" სხვა უმაღლესი კლასის ფეხბურთელებიც თამაშობენ. ყველაფერი უნდა გავაკეთოთ იმისთვის, რომ მათ მოედანზე თავი ისე არ იგრძნონ, როგორც სურთ. "ბარსელონას" როცა ბურთი უჭირავს, მაშინ ბევრი სახიფათო რამის გაკეთება შეუძლია.

კვირის დასაწყისში, კასილასმა განაცხადა, რომ ერთ–ერთი მნიშვნელოვანი ფაქტი ამ მატჩის მოგებისა, არის გოლის არ გაშვება. რას ფიქრობთ ამასთან დაკავშირებით?

კლუბი მოედნის ორივე ბოლოსკენ იქნება კონცენტრირებული. როცა ყველა აკეთებს იმას, რაც მას ევალება, მაშინ საქმე კარგად იქნება. სხვა სეზონებისგან განსხვავებით ამ სეზონში კლუბი კარგ ფორმაშია. არიან ფეხბურთელები, რომლებიც ძალიან კარგად ართმევენ თავს მათთვის დაკისრებულ მოვალეობას მოედნის ამა თუ იმ პოზიციაზე, რაც დაცვის ხაზს უკეთესად თამაშის საშუალებას აძლევს.

როგორ ახსნით იმ ფაქტს, რომ თქვენ 77 ქულა დაგიგროვდათ და მეორე ადგილზე მყოფ კლუბთან არანაირი განსხვავება არ არსებობს?

სხვადასხვა ლიგაში ჩემპიონსა და მეორე ადგილოსანს შორის განსხვავება სულ მინიმალურია. მთავარია, რომ ასე თამაში გავაგრძელოთ, ვინაიდან საქმეები ძალიან რთულადაა და რაც შეიძლება ბევრი ქულის მოპოვება გვჭირდება ლიგის მოსაგებად. ეს შთამბეჭდავი დუელია და ამიტომ მოგებაც უფრო სასიამოვნო იქნება.

გრძნობთ თუ არა რამე სახის ზეწოლას , როცა იცით, რომ მსოფლიო საფეხბურთო სამყაროს მზერა ხვალ ამ მატჩისკენ იქნება მომართული?

როცა მოედანზე ხარ, ამაზე ნაკლებად ფიქრობ. ერთადერთი, რასაც შენი გონება აღიქვამს ბურთია. არ ღელავ იმ ადამიანებზე, რომლებიც შესაძლოა, რომ შენს თამაშს ადევნებდნენ თვალყურს. შენ მხოლოდ და მხოლოდ მოგებაზე ხარ ფოკუსირებული.

არის თუ არა რაიმე გზა, რომლის საშუალებითაც შესაძლებელი იქნება ამ მატჩზე ამდენი ფიქრისგან ცოტა ხნით თავის შეკავება?

ცდილობ, რომ არ იფიქრო, მაგრამ ეს ძალიან ძნელია. ასევე ფიქრობ იმაზე, თუ რა შეიძლება მოხდეს. ეს აზრები მტელი დღის განმავლობაში თან გდევს.

იქნება თუ არა ფრე კარგი შედეგი?

ჩვენ ფრეზე არ ვფიქრობთ. ჩვენ მხოლოდ და მხოლოდ მოგებასა და მორიგ სამ ქულაზე ვართ ფოკუსირებულები. "მადრიდის რეალს" ფრეზე თამაში არ უხდება, განსაკუთრებით კი სახლში, ასე რომ ჩვენი მიზანი მოგება და "ბარსელონასთან" ქულათა სხვაობის გაზრდაა. კლუბისთვის მოგება ძალიან მნიშვნელოვანი იქნება. ანალოგიური დატვირთვა ექნება მოგებას გულშემატკივრებისთვის.

რას ეტყოდით იმ გულშემატკივრებს, რომლებიც თამაშს დაესწრებიან?

"ბარსელონასთან" პირველი წრის შეხვედრისას ბევრი ჩვენს განადგურებას წინასწარმეტყველებდა, მაგრამ მთელი პირველი ტაიმი ჩვენ ვაკონტროლებდით სიტუაციას და ადვილად შეგვეძლო იმ შეხვედრის მოგება. ასე რომ გულშემატკივრებმა უნდა ირწმუნონ, რომ საკუთარ სტადიონზე და საკუთარი გულშემატკივრების თვალწინ მოგება შეგვიძლია. გვსურს, რომ ჩვენი გულშემატკივრები თავს ბედნიერად გრძნობდნენ და ამისთვის ყველაფერს გავაკეთებთ. დავამტკიცებთ, რომ შეგვიძლია ლა ლიგის მოგება.

რას ფიქრობთ, რა ანგარიშით დასრულდება შეხვედრა?

2:1 "მადრიდის რეალის" სასარგებლოდ.

და ერთ გოლს თქვენ გაიტანთ , არა?

ამის თქმა ძალიან ძნელია. თუ გადავხედავთ ბომბარდირთა სიას, მაშინ მივხვდებით, რომ ამის გაკეთება იგუაინსა და კრიშტიანო რონალდუს უფრო გაუადვილდებათ.

წყარო: Realmadrid.com