მარსელო:„კრიშტიანო რონალდუ მსოფლიოში საუკეთესოა“
მარსელო ვიეირამ ვრცელი და მრავლისმომცველი ინტერვიუ ჩაწერა, სადაც კრიშტიანო რონალდუსა და მადრიდულ კარიერაზეც ისაუბრა...
„ის, რაც ჩვენ ბოლო 5 წელიწადში გავაკეთეთ უბრალოდ დაუვიწყარია. მადრიდის „რეალის“ ყველა ქომაგმა უნდა გაითავისოს, რომ მათმა საყვარელმა გუნდმა 5 წელიწადზე 4-ჯერ მოიგო ჩემპიონთა ლიგა. ეს არის წარმოუდგენელი შედეგი, რომელიც სამუდამოდ დარჩება საფეხბურთო ისტორიაში. არ გამოვრიცხავ, მსგავსი რამ ვეღარასდროს მოხდეს, თუმცა ფეხბურთი ისეთი სპორტია, სადაც ვერასდროს გააკეთებ ზუსტ პროგნოზს.“
„ჩვენ ერთად, დიდი შრომისა და ძალისხმევის შედეგად შევქმენით უდიდესი კოლექტივი, რომელსაც მსოფლიო ნაკრების დამარცხებაც შეეძლო. თითოეული ფეხბურთელი განსაკუთრებული მოტივაციით თამაშობდა და თამაშობს. შეუძლებელია იყო, მადრიდული გიგანტის წევრი და არ გქონდეს პრეტენზიები.“
„ყველაფერი გავაკეთე იმისათვის, რომ მადრიდში ამ დონემდე მოვსულიყავი. ათწლეული ცოტა არ არის და ვფიქრობ, რომ კლუბის ისტორიაში ჩემი ადგილი დავიმკვიდრე.“
„კრიშტიანო რონალდუ ჩემი ყოფილი თანაგუნდელი და უახლოესი მეგობარია, ერთად არაერთი სიხარული განგვიცდია და ასევე უამრავი პრობლემა გადაგვილახავს. ჩემი აზრით, პორტუგალიელი კვლავაც მსოფლიოში საუკეთესოა, ლუკა მოდრიჩი კი ოქროს ბურთს ნამდვილად იმსახურებდა. რატომ? იმიტომ, რომ ბოლო 5 წელიწადში ჩემპიონთა ლიგის 4-ჯერ მოგებაში უდიდესი წვლილი შეიტანა. ის იყო კლუბის მამოძრავებელი ძალა და ანალოგიურ როლს ასრულებდა ხორვატიის ნაკრებშიც.“
„ჩვენ ვართ ცოცხალი ორგანიზმი, რომელიც ხან პროგრესირებს, ხანაც რეგრესს აჩვენებს. ვფიქრობ და დარწმუნებული ვარ, რომ 2019 წელი კლუბისთვის წარმატებული იქნება. შეუძლებელია მუდამ შევძლოთ ჩემპიონთა ლიგის მოგება, თუმცა ცხოვრების კრედოდ ტიტულების მოგება გვაქვს ქცეული. ჩვენთვის უმოტივაციო თამაში არ არსებობს, რადგან ისტორიული კლუბის ღირსებას ვიცავთ.“
„კლუბიდან მიდიან მოთამაშეები, ჩნდებიან ახალი სახეები, მაგრამ ფასეულობები არ იცვლება, აქედან გამომდინარე, „რეალი“ კვლავაც არის მსოფლიოს საუკეთესო გუნდი.“
„მას შემდეგ, რაც „რეალში“ ჩავირიცხე კლუბი არაერთმა ლეგენდარულმა ფეხბურთელმა დატოვა, მათ შორის არიან ბექჰემი, კანავარო, რონალდო, კარლოსი, ვან ნისტელროი, რაული, გუტი, კასილიასი, კაკა, კრიშტიანო, პეპე, და სხვა უამრავი მოთამაშე.“
„ხელმძღვანელობის მისამართით პრეტენზიების წარმოთქმა უბრალოდ უთამოყვარეობად მიმაჩნია, ვინაიდან ფლორეტინო პერესი უბრალოდ საუკეთესო პრეზიდენტია.“
- 16 დეკემბერი 2018
- 4 652
- 53