მაშ ასე. სანტიაგო სოლარის დროებითი მწვრთნელობის დრო ამოიწურა. მადრიდის „რეალმა“ ის ან ოფიციალურად უნდა წარადგინოს მთავარ მწვრთნელად, ანაც „კასტილიაში“ დააბრუნოს და სხვა მწვრთნელი დაასახელოს...

აღსანიშნავია, რომ არგენტინელის ხელში „ბლანკოსმა“ 4 მატჩი ითამაშა და ოთხივე მოიგო. სანტიაგოს 100%-იანი შედეგი აქვს.

4 მატჩში გატანილი 15 და გაშვებული 2 გოლი საკმაოდ კარგ შედეგად ითვლება.

იმ ფონზე, რომ „რეალი“ ლოპეტეგის მწვრთნელობის პირობებში ზედიზედ 4 მატჩის მანძილზე ვერ ახერხებდა გოლის გატანას, მწვრთნელის შეცვლის მერე თითო მატჩში საშუალოდ 4 გოლი, ნამდვილად უდიდესი მიღწევაა.

ესპანური გამოცემები იუწყებიან, რომ ფლორენტინო პერესი დირექტორთა საბჭოსთან ინტენსიურ მოლაპარაკებებს აწარმოებს და უახლოეს მომავალში შევიტყობთ, დარჩება თუ არა არგენტინელი კლუბის სათავეში.