გთავაზობთ ჩემპიონთა ლიგის 8 საუკეთესო გუნდის მიღწევებს ევროპის ყველაზე მაღალი დონის ტურნირზე.

მადრიდის „რეალი“

სამეფო კლუბი ჩემპიონთა ლიგაზე ყველაზე დიდ გამოცდილებას ფლობს. ამ გუნდს თასი 12-ჯერ აქვს მოგებული. მადრიდელები ჩემპიონთა ლიგის 1/4 ფინალში 35-ჯერ არიან გასულები, 28-ჯერ 1/2 ფინალში, ხოლო 15-ჯერ ფინალში. აღსანიშნავია, რომ „ბლანკოსს“ 15 ფინალიდან 12 მოგებული აქვს და მხოლოდ 3 მატჩში იწვნია მარცხი.

მიუნხენის „ბაიერნი“

„რეალის“ შემდეგ 1/4 ფინალში ყველაზე მეტჯერ „ბაიერნი“ გახლავთ გასული. გერმანელები 8 საუკეთესო გუნდს შორის 29-ჯერ მოხვნდნენ, მათ ასევე ნათამაშები აქვთ 19 ნახევარფინალი და 10 ფინალი, საიდანაც 5 მოიგეს, ხოლო 5 წააგეს.

კატალონიის „ბარსელონა“

ბარსელონელები 1/4 ფინალში 22-ჯერ გავიდნენ, საიდანაც 15 შემთხვევაში ნახევარფინალშიც გააღწიეს. რაც შეეხება ფინალს, „ბლაუგრანას“ 8 ფინალი აქვს ნათამაშები, საიდანაც 5 მოგებით დასრულდა, ხოლო 3 მარცხით.

ტურინის „იუენტუსი“

იტალიურ გუნდს 1/4 ფინალის საგზური 18-ჯერ აქვს მოპოვებული. „ბებერი ქალბატონი“ ნახევარფინალში 15-ჯერ მოხვდა, ფინალში კი 9-ჯერ. ტურინელებმა 9-იდან მხოლოდ 2 ფინალი მოიგეს 7 კი წააგეს. „იუვენტუსი“ ჩემპიონთა ლიგის ისტორიაში ყველაზე უიღბლო გუნდია.

„ლივერპული“

მერსისაიდელები 1/4 ფინალში 14-ჯერ მოხვდნენ, საიდანაც 9 შემთხვევაში ნახევარფინალში გააღწიეს. რაც შეეხება ფინალებს - 7 მატჩი, 5 გამარჯვება, 2 მარცხი. „წითლები“ ჩემპიონთა ლიგის 5 თასს ფლობენ.

„რომა“

დედაქალაქური კლუბი ჩემპიონთა ლიგის 1/4 ფინალში 4-ჯერ არის გასული, გუნდი ერთხელ მოხვდა ნახევარფინალში, ერთხელაფ ფინალში, თუმცა გამარჯვებას ვერ მიაღწია და ჩემპიონობის გემო არასდროს გაუსინჯავს.

მანჩესტერ „სიტი“

ხოსეპ გუარდიოლას გუნდი ჩემპიონთა ლიგის მიმდინარე სეზონის ერთ-ერთ ფავორიტად ითვლება, მაგრამ ამ გუნდს ხსენებულ ტურნირზე მცირე გამოცდილება აქვს. „სიტი“ 1/4 ფინალში ორჯერ არის გასული, ნახევარფინალში კი ერთხელ. მანჩესტერულ გუნდს ფინალში არასდროს უთამაშია.

„სევილია“

და ბოლოს ანდალუსიური სევილია. მონტელას გუნდმა 1/8 ფინალიდან „იუნაიტედი“ გამოთიშა და 1/4 ფინალში ისტორიაში მეორედ გავიდა. ეს ეტაპი „სევილიასთვის“ მაქსიმუმია, ვინაიდან 1/2 ფინალში არასდროს უთამაშია.