მადრიდის „რეალის“ ფეხბურთელების სეზონის დასკვნით ფაზაში შედიან...

ლა ლიგაში „ჟირონას“ წინააღმდეგ მატჩის შემდეგ სანაკრებო შესვენება იწყება და გუნდებს ფეხბურთელები მარტის ბოლოს დაუბრუნდებიან, აპრილის დასაწყისიდან კი სეზონი ყველაზე რთულ და „ცეცხლოვან“ ფაზაში შედის.

მადრიდის „რეალს“ სეზონის ბოლომდე მაქსიმუმ 15 მატჩი აქვს დარჩენილი. ზიზუს გუნდი 15 დაპირისპირებას იმ შემთხვევაში, გამართავს, თუ ჩემპიონთა ლიგის ფინალს ითამაშებს.

ლა ლიგაში 28 ტური უკვე მიილია. „მერენგების“ მიზანი მომდევნო 10 ტურში 30 ქულის აღება და სეზონის 87 ქულით დასრულებაა. დედაქალაქში ეჭვი არ ეპარებათ, რომ ამ მისიის შესრულების შემთხვევაში, „რეალი“ საპატიო მეორე ადგილს ყველა ვარიანტში დაიკავებს.

დანარჩენი 5-იდან 2 მატჩი აუცილებლად ჩატარდება, რომელიც 1/4 ფინალის ეგიდითაა დაგეგმილი. დარჩენილ 3 შეხვედრის ჩატარება-არჩატარების საკითხი კი თავად „თეთრების“ კარგ თამაშზეა დამოკიდებული.

მარტის შედარებით პასიური მეორე ნახევრის შემდეგ „რეალის“ ფეხბურთელებს ძალიან დიდი დატვირთვა ელით, ქომაგებს კი დიდი სიამოვნება, ვინაიდან წინ გრანდიოზული მატჩებია.