უკვე ცნობილია თარიღები, როდესაც მადრიდის „რეალი“ ჩემპიონთა ლიგის ჯგუფური ეტაპის შეხვედრებს გამართავს.

ზიდანის გუნდი პირველ შეხვედრას „აპოელთან“ ჩაატარებს. მატჩი 13 სექტემბრით დათარიღდა. აღსანიშნავია, რომ „რეალი“ პირველ შერკინებას ბერნაბეუზე გამართავს.

მეორე ტურში „რეალი“ „დორტმუნდს“ ესტუმრება, შეხვედრა 26 სექტემბერს შედგება.

ამის შემდეგ მადრიდელების მეტოქე „ტოტენჰემი“ იქნება. დაპირისპირება მადრიდში, 17 ოქტომბერს გაიმართება.

პირველ ნოემბერს, „ტოტენჰემი“ კიდევ ერთხელ შეხვდება „ბლანკოსს“, თუმცა საშინაო არენაზე.

მეხუთე ტურში ზიზუს კოლექტივის მეტოქე „აპოელი“ იქნება, პაექრობა 21 ნოემბრით თარიღდება.

ჩემპიონთა ლიგის ჯგუფურ ეტაპს „დორტმუნდთან შეხვედრა დახურავს, ამჯერად „რეალი“ მასპინძლის სტატუსით ისარგებლებს, შეხვედრა 6 დეკემბერს გაიმართება.