ზინედინ ზიდანმა „სევილიასთან“ მატჩისწინა პრესკონფერენცია გამართა...

„ნამდვილად ჯანსაღ კონკურენციას ველით, ვინაიდან მივიჩნევთ, რომ „სევილიას“ შესანიშნავად ჩამოყალიბებული გუნდი ჰყავს. იმედი გვაქვს, კარგი მატჩი გამოვა და გამარჯვება ჩვენ დაგვრჩება.“

„მსოფლიო საკლუბო ჩემპიონატის მოგებამ კიდევ უფრო დიდი მოტივაცია მოგვცა. ვთვლით, რომ ნაყოფიერი კვირა გვქონდა და ანდალუსიელებთან პაექრობისთვის სრულფასოვნად მომზადება შევძელით.“

„საშობაო შესვენება შესანიშნავი იყო. გუნდი პრე-სეზონიდან მოყოლებული აქტიურად მუშაობს და შრომას არ იზარებს. მძიმე კალენდარი გვაქვს. მატჩების ჩატარება ყოველ მესამე დღეს დიდ პრობლემებთან არის დაკავშირებული, მაგრამ ჩვენ „რეალი“ ვართ და ყველა გამოწვევა უნდა მივიღოთ.“

„ხამეს როდრიგესი გუნდს სჭირდება და ვთვლი, რომ ის უმაღლესი კლასის ფეხბურთელია. მესმის, რომ კოლუმბიელს მსოფლიო საკლუბო ჩემპიონატზე ასპარეზობა და დიდი დროის მიღება სურდა, მაგრა არსებული რეალობიდან გამომდინარე, სხვაგვარი გადაწყვეტილება მივიღე. ეს იმას არ ნიშნავს, რომ როდრიგესი საჭირო ფიგურა არ არის.“

„სერხიო რამოსი არ ითამაშებს იმიტომ, რომ რისკი არ ღირს. ესპანელმა იაპონიაში დიდი დატვირთვა მიიღო, თანაც იმ ფონზე, რომ რისკები მაშინაც არსებობდა. ის მალე დაგვიბრუნდება.“

„ზუსტად ერთი წელი გავიდა მას შემდეგ, რაც ფლორენტინო პერესის შემოთავაზებას დავთანმხდი და მადრიდის „რეალი“ ჩავიბარე. ამ ერთი წლის მანძილზე ძალიან ბევრი რამ მოხდა. მოხარული ვარ, რომ რამდენიმე ტიტული მოვიგე, თუმცა ნერვიულობით ბევრი თმა გამცვივდა (იცინის). ჩემთვის ასეთი წარმატება მოულოდნელი იყო.“

„ფეხბურთი ჩემი ცხოვრების უმთავრესი ნაწილია. ყოველთვის ვფიქრობდი და ახლაც ვფიქრობ, რომ გაუმჯობესება მუდამ შესაძლებელია, ყოველთვის უნდა იბრძოლო იმისათვის, რომ მაქსიმუმს მიაღწიო.“

„მიმდინარე სეზონში 2 ტიტული უკვე მოვიგეთ. ჩვენს ანგარიშზე ევროპის სუპერთასი და მსოფლიოს საკლუბო ჩემპიონატია, ახლა კი გვსურს, რომ სამეფო თასზე, ლა ლიგაში და ჩემპიონთა ლიგაზე ვიბრძოლოთ.“

„პეპე „რეალისთვის“ უმნიშვნელოვანესი ფიგურაა, ის „ბლანკოსის“ ღირსებას უკვე 10 წელია იცავს. ვისურვებდი, რომ კეპლერი ჩვენთან დიდხანს დარჩეს.“

„არ გამიკვირდება, თუ საუკეთესო მწვრთნელად არ დამასახელებენ, ამის ამბიცია არც მაქვს, რადგან მხოლოდ ერთი წელია პროფესიონალურ საქმიანობას ვეწევი.“

„ალვარო მორატას „იუვენტუსში“ დაბრუნება? მე არ ვფიქრობ, რომ ალვარო სამშობლოში ბედნიერი არ არის. ესპანელი ფეხბურთელი შესანიშნავად გამოიყურება და ჩემი პროექტის მნიშვნელოვანი ნაწილია.“

„2016 წელი კრიშტიანოსთვის უნიკალური იყო, მაგრამ ის არ გაჩერდება, რადგან ეს მის სტილში არ ჯდება. პორტუგალიელი ფეხბურთელი შესანიშნავად გამოიყურება და ღრმად მწამს, რომ ტრიუფალურ სვლას განაგრძობს. ის ხვალ არ იქნება, რადგან დასვენება სჭირდება.“

„ევროპის სუპერთასზე „სევილია“ დავამარცხეთ, მაგრამ ეს არაფრის გარანტი არ არის. ხვალ უშეღავათო ბრძოლას ველი.“