დანილო - ფეხბურთელი, რომელიც მადრიდის „რეალში“ დიდი ზარ-ზეიმის გადავიდა. ფეხბურთელი, რომელმაც „პორტოში“ საოცარი წარმოდგენები დადგა და „ბლანკოსის“ პრეზიდენტს პორტუგალიური კლუბისთვის ძალიან დიდი თანხა გადაახდევინა...

შარშანდელი სეზონის სტარტზე ექსპერტები თვლიდნენ, რომ დანიელ კარვახალი სათადარიგოთა სკამზე გადაინაცვლება, ძირითად შემადგენლობაში კი დანილო მოგვევლინებოდა. თავის მხრივ, სტარტი კარგი იყო და რაფაელ ბენიტესი ბრაზილიელ განაპირა მცველს ხშირად ენდობოდა. მეტიც, კარვახალს შარშანდელი ჩემპიონთა ლიგის ჯგუფურ ეტაპზე საერთოდ არ უთამაშია და შემადგენლობაში მუდამ დანილო იყო, ესპანელი ფეხბურთელი სათამაშო წუთებს მხოლოდ ლა ლიგაში იღებდა.

გარკვეულმა დაზიანებებმა, ფორმიდან ამოვარდნამ და ისეთი კონკურენტის ყოლამ, როგორიც დანიელ კარვახალი გახლავთ, ბრაზილიელ ფეხბურთელს დაღი დაასვა და ფაქტია, რომ ის მიმდინარე სეზონში აბსოლუტურად იგნორირებულია. მეტიც, დანიელი კარვახალი არის ფეხბურთელი, რომელსაც მოედანზე ყველაზე დიდი დრო აქვს გატარებული, მის ანგარიშზე მიმდინარე სეზონში 1560 წუთი გახლავთ.

სეზონის ბოლომდე დიდი დროა დარჩენილი, რაც იმას ნიშნავს, რომ დანილოს კიდევ აქვს მომატების დრო, სხვა შემთხვევაში კი მას აბარგებას უწინასწარმეტყველებენ.