ემილიო ბუტრაგენიო რიკარდო როდრიგესის აგენტთან შეხვედრას გეგმავს...

ფლორენტინო პერესს სურს, რომ მადრიდის „რეალში“ მარსელო ვიეირას ღირსეული შემცვლელი ჰყავდეს. ამით ამოსუნთქვის საშუალება მიეცემა, როგორც ბრაზილიელ ფეხბურთელს, ასევე ზინედინ ზიდანს და მთელ გუნდს, ვინაიდან განაპირა მცველის არყოფნის შემთხვევაში პრობლემები ხშირად იქმნება.

მარსელო რობოტი არ არის, აქედან გამომდინარე, მასაც სჭირდება დასვენება და სრულფასოვანი შემცვლელი.

ვრცელდება ინფორმაცია, რომ 31 აგვისტომდე მადრიდის „რეალი“ აუცილებლად დაიმატებს მარცხენა მცველს, ვინაიდან გუნდში ამის საჭიროება ნამდვილად დგას, სწორედ ამიტომ ემილიო ბუტრაგენიო რიკარდო როდრიგესის აგენტთან შეხვედრას გეგმავს.

მადრიდის „რეალი“ მზად არის, შვეიცარიელი ფეხბურთელის სანაცვლოდ 25 მილიონ ევროს შეელიოს, თავად მოთამაშესთან კი 6 წლიან კონტრაქტს მოაწეროს ხელი. როდრიგესი 1992 წელს არის დაბადებული და 25 აგვისტოს 24 წელი უსრულდება, რაც მადრიდის „რეალისთვის კიდევ უფრო მისასალმებელია. საყოველთაოდ ცნობილი გახლავთ, რომ პრეზიდენტი პერესი აქცენტს ახალგაზრდა ფეხბურთელებზე აკეთებს.