ზინედინ ზიდანმა „სევილიას“ დამარცხების შემდეგ პრესკონფერენცია გამართა...

„შესანიშნავი შეხვედრა ჩავატარეთ. ყოველთვის ვცდილობ და ვეცდები, რომ საუკეთესო გუნდი მყავდეს. დღეს „რეალმა“ საკუთარი ძალა სრულად გამოავლინა და გულშემატკივრებს ბრწყინვალე წარმოდგენა შესთავაზა. ვფიქრობ, ეს იყო ერთ-ერთი საუკეთესო მატჩი მას შემდეგ, რაც „ბლანკოსის“ მთავარი მწვრთნელის პოსტი დავიკავე.“

„ყველა შეხვედრა განსხვავებულია. ფეხბურთელებისგან მაქსიმუმს ვითხოვ და ვცდილობ, რომ ყველას მივცე შანსი, რათა მათი პოტენციალი გამოავლინონ.“

„ემერის გუნდი ესპანეთში ერთ-ერთი საუკეთესოა, მათ წინააღმდეგ თამაში იოლი არ არის, თუმცა ძალიან კარგი ინტენსივობის და კომბინაციური ფეხბურთის ხარჯზე წარმატებას მივაღწიეთ, ასე უნდა განვაგრძოთ.“

„კარიმ ბენზემას თამაში აუცილებლად უნდა გამოვყო. მთელი მატჩის მანძილზე, ფრანგი ფეხბურთელი ძალიან ბევრს მუშაობდა როგორც ნახევარდაცვაში, ასევე თავდასხმაში და ცდილობდა, რომ გუნდური თვალსაზრისით მოწოდების სიმაღლეზე მდგარიყო. „ცხრიანზე“ დიდი ფსიქოლოგიური ზეწოლა მოდის, მაგრამ ის მხოლოდ გუნდის წარმატებაზეა კონცენტრირებული.“

„კეილორ ნავასმა რამდენიმე მომენტში გუნდი იხსნა და ეფექტური თამაში შემოგვთავაზა. კოსტარიკელი კიპერი გუნდის ნაწილია და ყოველთვის დიდ დახმარებას გვიწევს. ახლა ის დაისვენებს და „ელ კლასიკოსთვის“ მოემზადება.“

„უდიდესი თამაში გველოდება. „ელ კლასიკო“ ბრწყინვალე მატჩია, რომლის ანალოგი მსოფლიოში არ არსებობს. სამწვრთნელო დონეზე „ბარსელონასთან“ პირველ შეხვედრას გავმართავ, მაგრამ ეს კლუბი ჩემთვის უცხო არ არის. გულშემატკირები დიდ სიამოვნებას მიიღებენ. ჩემ გუნდს „ნოუ კამპზე“ გამარჯვება შეუძლია.“

„მსაჯებზე კომენტარის გაკეთება არ მსურს, მთავარია გავიმარჯვეთ და კარგად ვიასპარეზეთ.“

„ჩვენი მიზანი ჩემპიონობა არ არის, ახლა პრიორიტეტად „ატლეტიკოს“ გასწრება და მეორე ადგილი უნდა დავისახოთ. შეუძლებელი არაფერია, მათ შორის ჩემპიონობაც, ვინაიდან მათემატიკური შანსი არსებობს, თუმცა არ ვფიქრობ, რომ „ბარსელონა“ ამხელა უპირატესობას გაანიავებს.“

„წინა ტურში „ლას პალმასის“ წინააღმდეგ, არც ისე კარგი შთაბეჭდილება დავტოვეთ. ფეხბურთელებთან ერთად მთელი მატჩი განვიხილე და დასკვნები გამოვიტანე, რომელზეც ინტენსიურად ვმუშაობ.“