მომავალ შაბათს სანტიაგო ბერნაბეუს "მალაგა" ეწვევა, ბევრის აზრით ეს გუნდი განწირულია, რადგან სამეფო კლუბი საკუთარ მოედანზე 100%–იან შედეგს აჩვენებს, მათი ამჟამინდელი მეტოქე კი საშუალოზე დაბალი დონის კლუბია. თუ მართლაც დედაქალაქელებმა იმარჯვეს, მაშინ ისინი წლევანდელი სეზონის რეკორდს მოხსნიან, საკუთარ მოედანზე მადრიდელები ათიდან 10 გამარჯვებას მიითვლიან და ნახევარ სეზონს მხიარულ ნოტაზე დაასრულებენ.

ასეთი შედეგი არც ერთ კლუბს არა აქვს. მადრიდისტებმა მეტოქის კარი 30–ჯერ აიღეს და მხოლოდ 6 გოლი გაუშვეს. ეს მართლაც შესანიშნავი შედეგია, ამას ისტორიაც დაგვიდასტურებს. ასეთი რეზულტატი მხოლოდ ოთხჯერ დაფიქსირდა სამეფო კლუბის დიად წარსულში (1989/90, 1992/93, 2003/04, 2007/08)–წლებში. "ბლანკოსის" შედეგს ვეღარ გაიმეორებს "მალიორკა", ამ გუნდს 8 საშინაო გამარჯვება აქვს. სეზონის ნახევარს ასეთივე შედეგით ასრულებს კატალონიის "ბარსელონა", ამ გუნდს რვა გამარჯვება და 1 ყაიმი აქვს მოპოვებული საშინაო არენაზე.