კვირას, 10 იანვარს დიდი მატჩი შედგა სანტიაგო ბერნაბეუზე. ერთმანეთს მადრიდის "რეალი" და "მალიორკა" დაუპირისპირდნენ. სამეფო კლუბმა ეს შეხვედრა 2–0 მოიგო, ამ სტატიაში კი იხილავთ თამაშის სრულ მიმოხილვას.

2010 წლისთვის ახალი სახეები გამოჩნდნენ მადრიდელთა რიგებში–რიკარდო კაკა და ფერნანდო გაგო. პირველივე წუთზე კრიშტიანო რონალდომ 50 მეტრიდან საჯარიმო შეასრულა და "მალიორკას" გოლკიპერს მოტივირებისკენ მოუწოდა. "თეთრებმა" შეხვედრა მაღალ ტემპში დაიწყეს, ეს მათ საგოლე მომენტებშიც შესანიშნავად აისახა.

მადრიდისტები შეტევაში ბრწყინვალედ ირჯებოდნენ, სამეფო კლუბის ფეხბურთელები "მალიორკელთა" დაცვას ნელ–ნელა არღვევდნენ და უფრო აძლიერებდნენ ზეწოლას. ამის მიუხედავად მეტოქე გუნდის ფეხბურთელები დიდი შემართებით იყვნენ გამაგრებულნი საკუთარ ნახევარზე, მაგრამ მადრიდის "რეალთან" ეს საკმარისი არაა, "თეთრებმა" პირველ 7 წუთშივე გახსნეს ანაგრიში. კაკამ დიდებული გადაცემა გაუკეთა იგუაინს, მანაც არ დააყოვნა და თავისი შესანიშნავი დრიბლინგით ორი მეტოქე დაუბრკოლებლად ჩამოიტოვა, ყველას ეგონა, რომ პიპიტა მარცხენა ფლანგზე გახსნილ კრიშტიანო რონალდოს გადააწოდებდა ბურთს, მაგრამ არგენტინელმა მოულოდნელად გაისროლა და ბურთი მარცხენა ცხრიანში შეაგდო. ასეთმა დასაწყისმა სანჩისები აღაფრთოვანა და საშინელი ამინდის მიუხედავად სიმღერის ხასიათზე მოიყვანა.

პირველ ნახევარში მადირდისტებმა მინიმუმ ექვსი საგოლე მომენტი გაანიავეს, მათგან ორი 100%–იანი... პირველ ჯერზე კაკა მეკარესთან პირისპირ აღმოჩნდა, მაგრამ ეს შანსი ვერ გამოიყენა. ძალიან დაუდევრად თამაშობდა კრიშტიანო რონალდოც, რომელმაც დაახლოებით 3 მომენტი გააფუჭა... პორტუგალიელისთვის ეს ყველაზე ცუდი მატჩი იყო, რაც კი გამადრიდისტების შემდეგ ჩაუტარებია. ტაიმის ბოლოს რონალდომ ბრწყინვალე დრიბლინგი გააკეთა, მან სამი მეტოქე მოიტოვა უკან და ძლიერი დარტყმით შეეცადა მეტოქის კარის აღებას, მაგრამ სიზუსტემ უმტყუნა.

მეორე ნახევარიც ისეთივე შემართებით დაიწყეს მადრიდელებმა, როგორც პირველი და შედეგი მე–2 წუთზევე მოიმკეს... პიპიტას შესანიშნავი რეიდი, ვან დერ ვაარტის შემცვლელმა გრანერომ გოლით დაასრულა. ამ ახალგაზრდა ფეხბურთელისთვის, ეს სანტიაგო ბერნაბეუზე პირველი ოფიციალური გოლი გახლდათ.

თოვა იმატებდა და იმატებდა, მოედანმა ნამდვილი მადრიდული ფორმა მოირგო და თეთრად შეიღება... მადრიდისტები ცდას არ აკლებდნენ, მაგრამ მეტი ბურთის შეგდებას ვერადავერ ახერხებდნენ. 53–ე წუთზე, ზემოთხსენებულმა კრიშტიანო რონალდომ კიდევ ერთი 100%–იანი მომენტი გაუშვა ხელიდან. 54–ე წუთზე კაკამ ითამაშა დაუდევრად და პორტუგალიელი ვარსკვლავის ბრწყინვალე გადაცემა ვერ გამოიყენა. გონსალო იგუაინმაც გააფუჭა ერთი საგოლე მომენტი, მან 63–ე წუთზე ვერ მოახერხა გოლის გატანა და საკუთარი გუნდის კიდევ დაწინაურება. იყო კიდევ ერთი შანსი, მაგრამ ამ მომენტს ყოველმიზეზგარეშე გასატან გოლად ვერ აღვიქვამთ, საჯარიმოს გარედან უძლიერესი დარტყმა შეასრულა გრანერომ, მაგრამ დუდუ ავატმა შესანიშნავად ითამაშა და მოიგერია ეს უძლიერესი და უზუსტესი დარტყმა.

70–ე წუთზე მოედანი ბრაზილიელმა კაკამ დატოვა, მის მაგივრად კი დათოვლილ ბერნაბეუზე კარიმ ბენზემა შემოვიდა. ფრანგი ბევრს ცდილობდა, მაგრამ არც მისთვის გამოდგა საუკეთესო შეხვედრა და ვერც მან შეძლო ბურთის გატანა. 83–ე წუთზე მადრიდულ არენას "ბლანკოსის" ლეგენდა გუტი დაუბრუნდა, რომელმაც დარჩენილ დროში დაგვამახსოვრა თავი და საგოლე გადაცემაც გააკეთა, ამის მიუხედავად მადრიდისტებმა მომენტი ჩვეულებისამებრ გაანიავეს. სამწუხაროდ ელ კაპიტანო ისევ თამაშგარე მდგომარეობაშია, პელეგრინიმ არც ამ შეხვედრაში მისცა მას თავის გამოჩენის საშუალება...

კარში დარტყმები 7–1

კუთხურები 6–4

ბურთის დაკარგვა 77–89

ბურთის ართმევა 65–54

მეკარეების ჩართულობა 5–9

ჯარიმები 8–14

ბურთის ფლობა 68–32