Sky Sport-ის ინფორმაციით, გონსალო იგუაინის "ნაპოლიდან" აბარგება თითქმის გადაწყვეტილია, აქედან გამომდინარე იტალიური კლუბი არგენტინელი შემტევის შემცვლელს ეძებს...

როგორც სჩანს, რაფაელ ბენიტესის გუნდის ხელმძღვანელობამ თვალი ხესე როდრიგესს დაადგა, რომელიც არც ისე კარგ სეზონს ატარებს, მაგრამ პერსპექტივა ნამდვილად აქვს. იტალიელებს შესანიშნავად ახსოვთ, თუ რა დონეზე ირჯებოდა ესპანელი შემტევი საშინელი ტრავმის მიღებამდე, რომლის შემდეგ საკუთარ თავს აღარ ჰგავს.

"ნაპოლის" ხელმძღვანელობას სამეფო კლუბის პრეზიდენტთან შესანიშნავი ურთიერთობა აქვს, რასაც რაულ ალბიოლის, ხოსე კალეხონის და პიპიტა იგუაინის იტალიაში გადასვლას მოწმობს, თუმცა უნდა აღინიშნოს კავანის საკითხი, როდესაც ნეაპოლელებმა ურუგვაელი არა მადრიდში, არამედ პარიზში გაუშვეს, რათა მეტი სარგებელი ენახათ.

ხესეს შეძენით რომის "ლაციოც" ინტერესდება და მოლაპარაკებების დაწყებას გეგმავს. როგორც სჩანს, სერია "ა"-დან როდრიგესისთვის რამდენიმე კლუბი იბრძოლებს, საბოლოო სიტყვა კი "ბლანკოსის" მმართველებზე იქნება დამოკიდებული.