"ატლეტიკოსთან" უმნიშვნელოვანეს დაპირისპირებამდე, გადავწყვიტე სტატია დამეწერა, სადაც არა მარტო ჩემი, არამედ თითქმის ყველა მადრიდისტას სათქმელი გამოვხატე (შევეცადე მაინც).

მატჩამდე რამდენიმე საათია დარჩენილი. თითოეული ჩვენგანი ფიქრობს, თუ რა შეიძლება მოხდეს, რა ანგარიშით დასრულდება მატჩი და ყველაზე მნიშვნელოვანი კითხვა, ვინ გავა შემდეგ ეტაპზე და რომელი გუნდი გააგრძელებს ბერლინისაკენ მიმავალ გზას?

"ატლეტიკო"
"არა, რეალი"

აზრი ორად იყოფა, ეს ბუნებრივიცაა. შანსები, თითქმის თანაბარია. კარგად მოგეხსენებათ, თუ როგორი კონკურენტია "როხიბლანკო" და როგორი წინააღმდეგობის გაწევა შეუძლია მას, როდესაც გამარჯვება სწყურია. გავიხსენოთ 2014 წლის 24 მაისი, ჩემპიონთა ლიგის ფინალი. დიდებული დღე, რომელიც ჩვენთვის, ლამის კოშმარად იქცა. ბოლო წუთებამდე ყველას სჯეროდა, რომ გამარჯვებული "ატლეტიკო" იქნებოდა. მაგრამ რას ვაკეთებდით ჩვენ, მადრიდისტები? ზოგი აცრემლიანებული თვალებით, ზოგი კიდევ ამღვრეული და გაკვირვებული სახით შესცქეროდა მატჩს. მატჩს, რომლის ბედიც თითქმის გადაწყვეტილი იყო, მაგრამ ამავდროულად არც ერთ ჩვენგანს არ დაუკარგავს იმედი და რწმენა იმისა, რომ წარმატებას სწორედ ჩვენ მოვიპოვებდით.

93–ე წუთი.კუთხური. ბურთთან მისული ლუკა მოდრიჩი. ჩაწოდება და ... გოლი! სერხიო რამოსის დიდებული თავური დარტყმა და გამარჯვებისკენ გადადგმული უდიდესი ნაბიჯი. ამას მოჰყვა გარეთ ბეილის, მარსელოსა და რონალდუს გოლები. ჩვენ გავიმარჯვეთ! აღვმართეთ ჩემპიონთა ლიგის თასი და 12 წლიანი პაუზის შემდეგ მოვიგეთ სანატრელი "ლა დესიმა"!

ამ ყველაფრის შემდეგ მე მიჩნდება კითხვა: არის რაიმე ისეთი, რისი გაკეთებაც "ბლანკოსს" არ შეუძლია?

მადრიდის "რეალი" ამჯერადაც თანაქალაქელ "ატლეტიკოს" უპირისპირდება. წინ ზუსტად ისეთივე ბრძოლა და თავდადება გველის, როგორიც ფინალში. მომავალს კვლავ მხოლოდ ერთი მატჩი გადაწყვეტს და ეს დაპირისპირება ფინალის ტოლფასი იქნება.

სამწუხაროდ, ჩვენ დიდი დანაკლისით გვიწევს თამაში (მარსელო, ლუკა მოდრიჩი, გარეთ ბეილი, ქარიმ ბენზემა), სწორედ ამიტომ, ბევრს არ აქვს იმის იმედი, რომ შემდეგ ეტაპზე "თეთრები" გავლენ.

ისტორია მეორდება– ჩვენი კვლავ არავის სჯერა. ვერავინ წარმოიდგენს იმას, თუ როგორ შეიძლება მსგავსი დანაკლისით "რეალმა" ის გუნდი დაამარცხოს, რომელიც მას შიდა ჩემპიონატის ყველა მატჩში უგებს, განსაკუთრებით კი ყველას ახსოვს ის "4:0".

კვლავ ვსვამ კითხვას, არის რაიმე ისეთი, რისი გაკეთებაც "ბლანკოსს" არ შეუძლია?


არა! ჩვენ ვართ 20 საუკუნის საუკეთესო კლუბად წოდებული მადრიდის "რეალი"! ჩვენ ვართ გუნდი, რომელიც ბოლომდე იბრძვის და მიზნის მისაღწევად ყველაფერს აკეთებს! მერე რა, რომ ჩვენ არ გვეყოლება ძირითადის 4 უმნიშვნელოვანესი ფეხბურთელი, სამაგიეროდ ჩვენ გვყავს გრანდი კაპიტანი და მეკარე იკერ კასილასი! გვყავს დიდებული დაცვის ხაზი, გვყავს გერმანიის საუკეთესო ფეხბურთელად აღიარებული– ტონი კროოსი, ესპანეთისა და მსოფლიო ფეხბურთის მომავლად წოდებული მაგიური ისკო ალარკონი, გვაყვს უნიჭიერესი ხამეს რიდრიგესი და ბოლოს, 3 "ოქროს ბურთის" მფლობელი და მსოფლიოს საუკეთესო (ერთ–ერთი საუკეთესო მაინც) კრიშტიანუ რონალდუ!!!!

ჩვენ შეგვიძლია გავიმარჯვოთ და შემდეგ ეტაპზე გავიდეთ, რადგან ამისთვის ყველანაირი რესურსი გვაქვს. მთავარია გვქონდეს ამის რწმენა .. როგორც მაშინ, 93–ე წუთამდე! გვქონდეს იმედი, რომელიც არასდროს გვაკლდა. ახლა კი თავად უპასუხეთ კითხვას, არის თუ არა რაიმე ისეთი, რისი გაკეთებაც არ შეუძლია მადრიდის "რეალს" ?!