ლუკა მოდრიჩის დაბრუნებით მადრიდელთა სათამაშო სტილი კვლავ აღზევდა.

"შალკესთან" და "ვილიარეალთან" უიღბლობის შემდეგ თითქოს პრობლემის დაძლევის შანსი არ ჩანდა, თუმცა "ლევანტესთან" ძირითად შემადგენლობაში გამოჩენილმა ხორვატმა ნახევარმცველმა ყველა კითხვის ნიშანი მოხსნა.

მოდრიჩმა გასულ შეხვედრაში 77 წუთი გაატარა მინდორზე, რაც დაგეგმილზე 17 წუთით მეტი აღმოჩნდა. მადრიდელთა "19" ნომერი კვლავ ბრწყინვალედ ასპარეზობს. კარლო ანჩელოტი იმედს გამოთქვამს, რომ ნოუ კამპზე ლუკა 90 წუთის გატარებას მოახერხებს.

29 წლის ფეხბურთელი ისკოსთან ერთად იმდენად კარგად ართმევდა თავს დაკისრებულ მოვალეობას, არც ეტყობოდა, რომ მძიმე ტრავმის გამო მას რამდენიმე თვე ჰქონდა გაცდენილი. სწორედ მოდრიჩის წყალობით "ლევანტესთან" შეხვედრა თეთრებმა 67%-იანი ბურთის ფლობით დაასრულეს. "შალკესთან" კი "თეთრები" მხოლოდ 49%-ს დასჯერდნენ.

აღსანიშნავია, რომ გასულ შეხვედრაში ლუკა საუკეთესო მეპასედ დასახელდა. მან მატჩის მიმდინარეობის დროს 78 გადაცემა გააკეთა, საიდანაც 73 ზუსტი აღმოჩნდა, რაც პროცენტულად 93.6%-ს შეადგენს.

Marca.com