კარლო ანჩელოტის ძალიან უყვარს მადრიდი და ადგილობრივი კლუბი, რომელსაც წვრთნის, ის ესპანეთის დედაქალაქში საკმაოდ კომფორტულად მოეწყო, დაძლია ენის ბარიერი და ერთ წელიწადში 4 ტიტულის მოპოვება შეძლო. 3 თვის წინ ვერავინ წარმოიდგენდა, თუ იტალიელი სპეციალისტის მომავალი ბურუსით დაიფარებოდა, თუმცა ეს ფეხბურთია, სადაც არასდროს არაფერია გამორიცხული. ეს მადრიდის "რეალია", სადაც მცირე ჩავარდნასაც არ გპატიობენ, ეს კლუბია, სადაც ყოველ წელს ჩემპიონთა ლიგის მოგება სურთ...

"მარკას" ინფორმაციით კარლო ანჩელოტის მომავალს განსაზღვრავს 22 მარტის "ელ კლასიკო", რომელიც კატალონიაში გაიმართება და სეზონის ბოლოს დაფიქსირებული რეზულტატი.

თუ კარლიტო ლა ლიგის მოგებას შეძლებს, მისი მომავალი უფრო ნათელი ფერებით შეინიღბება, სხვა შემთხვევაში კი დიდია შანსი იმისა, რომ პრეზიდენტმა, ფლორენტინო პერესმა გუნდის დამრიგებელს კარისკენ მიუთითოს.

ამავე წყაროზე დაყდნობით, "ბლანკოსში" მიმდინარე მოვლენებს დიდი ყურადღებით აკვირდება ინგლისური მანჩესტერ "იუნაიტედი" და ანჩელოტის გათავისუფლების შემთხვევაში მყისვე საინტერესო შეთავაზებისთვის ემზადება.

ლუის ვან გაალის დღეები მანჩესტერში დათვლილია, რადგან ჰოლანდიელი სპეციალისტი ვერ აჩვენებს სასურველ შედეგებს და ვერანაირ კონკურენციას ვერ უწევს ლონდონის "ჩელსის". გასული ზაფხულის სატრანსფერო ფანჯარაზე "უტდ"-მ ლონდონელებზე 3-ჯერ მეტი თანხა დახარჯა, მაგრამ ეს ყველაფერი სატურნირო ცხრილზე ვერ აისახა. ლუისის გუნდს ჩემპიონობის შანსი უკვე დაკარგული აქვს, სწორედ აქედან გამომდინარე ინგლისელები კარლიტოს კანდიდატურას განიხილავენ.