პეპეს მომავალი კითხვის ნიშნის ქვეშ დგას...

ჯერ-ჯერობით უცნობია მადრიდის "რეალის" პორტუგალიელი ცენტრალური მცველის მომავალი. სამეფო კლუბის ხელმძღვანელობა დიდ საფიქრალშია, მათ გაუჩნდათ უამრავი კითხვა. საქმე იმაშია, რომ პეპე თებერვალში 32 წლის გახდება, რაც ზოგადად ფეხბურთელისთვის ასაკში შესვლას ნიშნავს. მიუხედავად ამისა, მადრიდელთა მესამე ნომერი იდეალურ ფორმაშია და თითქმის უშეცდომოდ ატარებს ყველა მატჩს.

ცნობისთვის გეტყვით, რომ კეპლერს "ლოს ბლანკოსთან" კონტრაქტი 2016 წლამდე აკავშირებს. ფლორენტინო პერესის აზრით, პორტუგალიელი მცველი კიდევ შეძლებს ორი წელი უმაღლეს დონეზე თამაშს და სწორედ ამიტომ, იგი ახალი ხელშეკრულების მომზადებას გეგმავს.

პეპე კარლო ანჩელოტის შემადგენლობაში ერთ-ერთი უცვლელი ფიგურაა. იტალიელი სპეციალისტი მისი თამაშით კმაყოფილია და იმედს გამოთქვამს, რომ გამოცდილი ფეხბურთელი კონტრაქტს გაახანგრძლივებს. აღსანიშნავია ისიც, რომ "სამიანის" შეძენით ინტერესდება ორი მანჩესტერული კლუბი, "იუნაიტედი" და "სიტი".

Marca.com