მადრიდის "რეალს" 2015 წლის დაწყება ურთულესი მატჩებით მოუწევს, კარლო ანჩელოტისთვის 2015 წლის პირველი თვე შესაძლოა ბევრ ასპექტში გარდამტეხიც იყოს...

4 იანვარს დედაქალაქელები "ვალენსიაში" ჩაფრინდებიან, სადაც ადგილობრივებთან გაარკვევენ ურთიერთობას. მატჩი "მესტალიაზე", თბილისის დროით 20:00 საათზე დაიწყება. "ღამურები" მიმდინარე სეზონში საკმაოდ ხარისხიან ფეხბურთს თამაშობენ და ოთხეულში გასვლის იმედი აქვთ.

7 იანვარს "მერენგები" "ვისენტე კალდერონს" ესტურმებიან, სადაც არანაკლებ მძიმე მატჩის ჩატარება მოუწევთ. მეტოქე "ატლეტიკო" იქნება, მატჩი კი სამეფო თასის ეგიდით, თბილისის დროით 23:00 საათზე გაიმართება.

10 იანვარს კი "ბლანკოსი" საშინაო არენაზე კატალონიის "ესპანიოლს" მიიღებს. შეხვედრა თბილისის დროით 19:00 საათზე შედგება.

როგორც ვხედავთ, დედაქალაქელებს 4-იდან 10 იანვრის ჩათვლით 3 პაექრობის გამართვა უწევთ, თანაც მაღალი კლასის გუნდებთან. ამ დაპირისპირებებმა შესაძლოა ბევრი რამ გადაწყვიტოს როგორც სამეფო თასზე, ასევე ლა ლიგაში, სადაც "ბლანკოსი" ლიდერად გვევლინება.