მადრიდის "რეალი" 2014 წელს ლა ლიგის სათავეში დაასრულებს.გუნდმა "ზამთრის ჩემპიონის" სტატუსი გუშინ გაიფორმა, როდესაც კატალონიის "ბარსელონამ" "ხეტაფესთან" ნულოვანი ფრე დააფიქსირა...

მოგეხსენებათ, დედაქალაქელები "სევილიასთან" მატჩს საკლუბო მუნდიალის გამო გამოტოვებენ, ანდალუსიელებთან დაპირისპირების თარიღი ჯერ-ჯერობით უცნობია, თუმცა სავარაუდო თარიღი იანვრის მეორე ნახევარი იქნება.

ლუის ენრიკეს შეგირდების წარუმატებელმა გამოსვლამ "ბლანკოსსა" და "ბლაუგრანას" შორის სხვაობა 4 ქულამდე გაზარდა. მართალია "ბარსელონა" მიმდინარე წელს კიდევ ერთ მატჩს გამართავს, რომელიც ლა ლიგის მე-16 ტურის ეგიდით ჩატარდება, თუმცა გამარჯვების შემთხვევაშიც კი ვერ დაეწევა ანჩელოტის გუნდს. მაქსიმალური შედეგი კატალონიელთათვის 1 ქულიანი ჩამორჩენის დაფიქსირება იქნება.

საკლუბო მუნდიალის 1/2 ფინალში წარმატების შეთხვევში, "მერენგები" მეორე მატჩს 20 დეკემბერს გამართავენ, რის შემდეგაც ესპანეთის დედაქალაქისკენ აიღებენ გეზს. ბოლო შერკინებას კი ამხანაგური ხასიათი ექნება, სადაც ანჩელოტი "მილანელებს" დაუპირისპირდება.