მადრიდის "რეალის" ყოფილი პრეზიდენტის, რამონ კალდერონის აზრით კრიშტიანო რონალდუს მანჩესტერ "იუნაიტედში" დაბრუნება გასაკვირი არანაირად არ იქნება, რადგან ფლორენტინო პერესს ფეხბურთელის დათმობა არ უჭირს...

"გასაგებია, რომ კრიშტიანო იმედგაცრუებულია. ამ ფეხბურთელს ყოველთვის დიდი ენთუზიამი აქვს, დარწმუნებული ვარ მას მართლაც უნდოდა ჩემპიონთა თასის მეორედ მოგება, თუმცა ამჟამინდელი შემადგენლობით "ბლანკოსს" წარმატების მიღწევა გაუჭირდება."

"როდესაც პრეზიდენტი ვიყავი არიენ რობენი დავიმატე, რომელიც გუნდისთვის ძალიან დიდი ძალა იყო, თუმცა პერესმა ის გაუშვა. იყო დრო, როდესაც ჰოლანდიელი ფეხბურთელის გარეშე "ბლანკოსი" წარმოუდგენელი იყო. იგივეს თქმა შემიძლია ანხელ დი მარიასა და ჩაბი ალონსოზე, ამ ორი უდიდესი ძალის გარეშე კარლოს გუნდს ნამდვილად ვერ აღვიქვამდით, თუმცა დღეს ერთი მანჩესტერ "იუნაიტედის" ღირსებას იცავს, მეორე კი მიუნხენის "ბაიერნის", სამეფო კლუბს კი უკვე დაეტყო დანაკლისი."

"მადრიდში გადასვლისთანავე "შვიდიანმა" განაცხადა, რომ "უტდ" მისი გულიდან არასდროს წაიშლება, აქედან გამომდინარე ნამდვილად არ გამიკვირდება თუ რონი ინგლისს მიაშურებს, პერესი კი მწვანე შუქს აუნთებს, რადგან ის არასდროს არავის გაყიდვას არ არიდება."