გავრცელებული ინფორმაციის თანახმად, მადრიდის "რეალი" გერმანელ ნახევარმცველს, სამი ხედირას ტრანსფერზე აყენებს და ნებისმიერი მსურველი წინადადებას განიხილავს...

ტონი კროოსის მოსვლის შემდეგ მისი თანამემამულის შანსები კიდევ უფრო შემცირდა. სუპერთასის დაპირისპირებაში ტონიმ ზუსტი პასების 95%-იანი მაჩვენებელი გამოაცხო, რამაც როგორც ფლორენტინო პერესი, ასევე კარლო ანჩელოტი აღაფრთოვანა.

ის, რომ ბაიერნიდან გადმოსული ნახევარმცველი სასტარტოსთვის იბრძოლებს ნათელია, იგი შესაძლოა სულ მალე კარლოს დასაყრდენიც გახდეს.

ხედირას შეძენით "არსენალის" ხელმძღვანელობა იყო დაინტერესებული, მაგრამ მოლაპარაკებები ვერ შედგა, ახლა კი "მეთოფეებს" კიდევ შეუძლიათ "ბლანკოსს" მიმართონ, რადგან სიტუაცია შეიცვალა და სამის შანსები ამჟამინდელ კლუბში კიდევ უფრო შემცირდა.

გუნდის ნახევარდაცვაში ძალიან დიდი კონკურენციაა, აქედან გამომდინარე ხედირას გაშვება ოპტიმალური ვარიანტია, რადგან ამით კონკურენცია შედარებით შემცირდება და კლუბი ფინანსურ სარგებელს მიიღებს, რომელმაც დაახლოებით 30 მილიონი ევრო უნდა შეადგინოს, ამას კი დაემატება ის თანხაც, რომელიც გერმანელმა ფეხბურთელმა მომდევნო წლებში ხელფასის სახით უნდა მიიღოს.