ალვარო არბელოას მადრიდული მომავალი ბურუსით არის მოცული, თუმცა ესპანელი ფეხბურთელი კლუბთან ერთად იმყოფება და ამერიკის შეერთებულ შტატებში პრე-სეზონის ნაყოფიერად გავლას ცდილობს...

იტალიურ საინფორმაციო წყაროებზე დაყრდნობით გამოცდილი მარჯვენა მცველის შეძენა ფლორენციის "ფიორენტინას" სურს და ტრანსფერისათვის 5.5 მილიონი ევრო აქვს გამოყოფილი.

ფლორენციელები ალვაროს წლიურად 1.7 მილიონ ევროს და 2 წლიან თანამშრომლობას შესთავაზებენ. ისინი თვლიან, რომ გამოცდილი უკანახაზელი სერია "ა"-ს უცებ მოერგება და კლუბის დაცვის ხაზს გააძლიერებს.

კარლო ანჩელოტის მარჯვენა ფლანგზე დანიელ კარვახალი ჰყავს, თუმცა ის მხოლოდ ერთადერთი მარჯვენა მცველი დარჩება კლუბში, ამიტომ ალვაროს გაშვებამდე იტალიელი სპეციალისტი "კასტილიელთა" უკანახაზელებს გადაავლებს თვალს. იმ შემთხვევაში თუ დანიელის შემცვლელი მწვრთნელმა ვერ იპოვა, არბელოას წასვლა გამორიცხულია, სხვა სიტუაციაში კი შესაძლოა პერესი შეელიოს "ორიანს".