იტალიურ საინფორმაციო წყაროებზე დაყრდნობით სერია "ა"-ს ბინადარი "ვერონა" რაფაელ ვარანის გადაბირებით არის დაინტერესებული...

შარშანდელი სეზონი იტალიური კლუბისთვის წარმატებულად ჩაითვალა, რადგან მათ მოახერხეს და უმაღლეს ლიგაში ადგილი შეინარჩუნეს, თანაც არა ცხრილის ქვედა, არამედ შუა ნაწილში, ვერონელებმა 38 დაპირისპირებაში 54 ქულას მოუყარეს თავი და მე-10 პოზიციაზე განლაგდნენ.

როგორც ჩანს "ყვითლებს" მიღწეული არ აკმაყოფილებთ და მომდევნო სეზონში ევროსარბიელისთვის უნდა ბრძოლა, დაცვის ხაზის გაძლიერება კი პრიორიტეტული გახლავთ.

შეგახსენებთ "ვერონამ" ლუკა ტონის გადაბირებაც მოახერხა, რომელმაც ასაკის მიუხედავად სერია "ა"-ში 20 ბურთი შეაგდო და მხოლოდ 2 გოლით ჩამორჩა საუკეთესო ბომბარდიტ იმობილეს.

გავრცელებული ინფორმაციის თანახმად იტალიელები მზად არიან მადრიდის "რეალის" ბიუჯეტში ახალგაზრდა რაფაელის სანაცვლოდ 20 მილიონი ევრო გაიღონ, რაც გუნდის ბიუჯეტს საკმაოდ სერიოზულ დარტყმას მიაყენებს, თუმცა მათი აზრით ფრანგი უკანახაზელი კოლექტივს ძალიან დიდ სამსახურს გაუწევს.