ფაბიო კაპელოს განცხადებით, კარლო ანჩელოტიმ კიდევ ერთხელ დაამტკიცა, რომ უდიდესი ტაქტიკოსი გახლავთ...

"იტალიელი დიდებული მწვრთნელია, მან ყოველთვის ძალიან კარგად იცის კონკრეტულ სიტუაციაში რა სჭირდება. არავინ დაობს იმაზე, რომ მიუნხენის ბაიერნი მიმდინარე წელს როგორც შარშან საუკეთესო ფეხბურთს თამაშობს, მათ წინააღმდეგ ასპარეზობა დიდ სირთულეებთან არის დაკავშირებული, გამარჯვება კი მუხლჩაუხრელი შრომის შედეგია."

"კარლომ იცოდა, რომ ბერნაბეუზეც პირველ ნომრად გვარდიოლას გუნდი მოგვევლინებოდა, რადგან მათ ძალიან მობილური და შეკრული გუნდი ჰყავთ, რეალი კი ახლა ყალიბდება."

"არამგონია "ალიანს არენაზე" სიტუაცია შეიცვალოს, ანჩელოტი დაცვაში არ ჩაჯდება, თუმცა ის ინიციატივას რა თქმა უნდა, მასპინძლებს დაუთმობს. "ბლანკოსი" მწვავე კონტრშეტევებს განახორციელებს, მათ არაერთი მოთამაშე ჰყავთ, რომელიც ძალიან სწრაფად გადადის მეტოქის ნახევარზე და მწვავედ უტევს, ბაიერნის მცველებს დიდი ჯაფა დაადგებათ."

"აღსანიშნავია გარეთ ბეილის დაბრუნება, უელსელმა "მერენგებს" საკმაოდ დიდი დახმარება უნდა გაუწიოს, ის ძალიან სწრაფია და შეუძლია მცველების დახმარებაც, მისნაირი ფეხბურთელები მსგავსი ტიპის პაექრობებში უდიდეს როლს ასრულებენ."

"ვფიქრობ, რეალს შედარებით მეტი შანსი აქვს, რადგან საკუთარ მოედანზე გოლი არ გაუშვია, თუმცა მიუნხენური გიგანტი ყველაფერს გააკეთებს ფინალში გასასვლელად."

"ამ თამაშში ის გუნდი მიაღწევს წარმატებას, რომელიც შეტევაში უზუსტესი იქნება, მსგავს დაპირისპირებებში თითოეული მომენტის გამოყენებას უდიდესი მნიშვნელობა აქვს."