მალაგას მოთამაშის, ელიზეუ ფერეირას განცხადებით მის გუნდში განსაკუთრებულმა განწყობამ დაისადგურა და მთელი კოლექტივი დაირაზმა იმისათვის, მადრიდული გიგანტის დამარცხება მოახერხოს...

"კარლო ანჩელოტის ბრწყინვალე გუნდი ჰყავს, რომლის საწინააღმდეგო მალაგას ნამდვილად არაფერი აქვს, თუმცა ძალიან გვსურს დედაქალაქელთა დამარცხება, რადგან ვთვლით, რომ სატურნირო ცხრილი მე-13 ადგილი ჩვენ არ შეგვშვენის, წინსვლისთვის კი გამარჯვებებია საჭირო, რომელიც აუცილებლად უნდა მოვიპოვოთ."

"ისკო ალარკონი მალაგაში გაცილებით უფრო პროდუქტიული იყო, თუმცა აუცილებლად უნდა აღვნიშნოთ, რომ "ბლანკოსში" ადაპტაცია ყველას უჭირს და შესაძლოა გავიდეს დრო, რის შემდეგაც ესპანელმა საკუთარი თავი იპოვოს და "მერენგების" ლიდერი გახდეს, მე მას დიდ პატივს ვცემ და მაღალი დონის ფეხბურთელად მივიჩნევ."

"მთავარმა მწვრთნელმა ყველას შთაგვაგონა, რომ მოგება შეგვიძლია, ამისათვის კოლექტივის თითოეული ფეხბურთელი ბოლომდე იბრძოლებს, მოედანზე არაფრის დათმობას არ ვაპირებთ."

"ყოველთვის სასაცილოდ მივიჩნევ კითხვას, რომელიც სამეფო კლუბის ყველაზე სახიფათო მოთამაშეს ეხება.კრიშტიანო რონალდუ ოქროს ბურთის მფლობელია და ალბათ ამით ყველაფერია ნათქვამი, მადრიდელთა შვიდიანი ნებისმიერ მომენტში შეიძლება გახდეს სახიფათო, ის უბრალოდ დიდებულია."