ინგლისში გავრცელებული ინფორმაციების მიხედვით, მანუელ პელეგრინი ძალიან კარგად ხვდება, რომ ისკო ალარკონი მადრიდის რეალში ფეხს ვერ მოიკიდებს და ზაფხულის სატრანსფერო ფანჯრის დროს მის შეძენას შეეცდება...

კარლო ანჩელოტის ფორმაციის "ბლანკოსში" ალარკონი ვერ ჯდება. მიუხედავად იმისა, რომ ახალგაზრდა ნახევარმცველმა სეზონი ძალიან კარგად დაიწყო, უკვე თვეები გავიდა მას შემდეგ, რაც სათადარიგოთა სკამზე ზის და მწვრთნელის დაძახებას ელოდება.

ისკო გამთამაშებლის პოზიციაზე იშვიათად თამაშობს, ის ან "ცრუ ცხრიანის" პოზიციაზე გვევლინება, ხანაც ცენტრალურ ნახევარმცველად, რომელსაც მეტწილად საყრდენის დახმარება ევალება და არა გამთამაშებლის ფუნქციების შესრულება.

Daily Mail-ის ინფორმაციით მანუელ პელეგრინის ესპანელი მოთამაშე ძალიან მოსწონს და ზაფხულში მადრიდული გიგანტის ხელმძღვანელობასთან მოლაპარაკებების გამართვას გეგმავს, ჩილელ სპეციალისტს ნიჭიერი ფეხბურთელის შეძენა ხელსაყრელ ფასად სურს.