- გუტი, შენთან დაკავშირებით რა ვითარებაა?
- არაფერი განსაკუთრებული, თანაგუნდელებთან ერთად ვვარჯიშობ და საკუთარ შანსს ველი. უკვე 10 წელია, რაც ამ კლუბში ვირიცხები და “ბლანკოსში” კარიერის დასრულებაზეც არ ვიტყოდი უარს.

- გუნდის ასპარეზობას როგორ შეაფასებდი?
- სწორ გზაზე ვდგავართ, ერთი ეგაა, შეთამაშება გვაკლია და ყველაფერი იდეალურად იქნება. მოკლედ, თანდათან ვუმატებთ, რაც “რასინგთან” მატჩშიც დამტკიცდება.

- კრისტიანო რონალდოზე რას იტყვი?
- რონალდოს არყოფნა გუნდს ძალიან დაეტყო, ახლა მისგან ყველა გაბრწყინებას ელის, თუმცა უნდა ვაცალოთ ფორმაში თავიდან შესვლა. საქმე ისაა, რომ “რეალი” ერთ ფეხბურთელზე დამოკიდებული გუნდი არაა, შესაბამისად, კრისტიანოს შემცვლელი გუნდში გვყავს.

- რონალდოს, როგორც მოთამაშეს, როგორ აღწერდი?
- დიდებული ფეხბურთელია. შეუძლია თამაში ინდივიდუალურად მოიგოს. ყველაზე მთავარი კი ისაა, რომ პორტუგალიელი ფინტების მთელი კასკადის მიუხედავად, რასაც ყოველ მატჩში გვთავაზობს, ყოველთვის გუნდზე თამაშობს.

- რახან რონალდო აღწერე, მოდი, მეორე ახალწვეული, კაკაც დაგვიხასიათე.
- ბრაზილიელიც გუნდური მოთამაშეა, თუმცა ამ შემიძლია არ აღვნიშნო მისი გენიალური პასები, რომლებიც, თითქმის ყოველთვის, მწვავე იერიშებით სრულდება. რიკი დაცვაშიც ხშირად ჩამოდის, რაც არანაკლებ მნიშვნელოვანია.

- ბენზემაზე რას იტყვი?
- კარიმს ძალიან დიდი მომავალი აქვს. შესაძლოა, ადაპტაცია ოდნავ გაეწელოს, თუმცა როცა სრულად გაიხსნება, “რეალის” ერთ-ერთ ლიდერად ჩამოყალიბდება.

- ხაბი ალონსოს კი ძალიან კარგად იცნობ...
- ხაბი შეტევასა და დაცვაში თანაბრად ნაყოფიერია. თითქმის ყველა იერიში სწორედ მისი ორგანიზებით იწყება.

- მანუელ პელეგრინის შესახებაც თქვი.
- მანუელს ესპანეთში ძალიან დიდი გამოცდილება დაუგროვდა. ამჟამინდელი გუნდისთვის იდეალური მწვრთნელია. ჩვენც ისღა დაგვრჩენია მას ვენდოთ და ხელი შევუწყოთ.

- რაულთან ერთად კაპიტნობის გაზიარება, ალბათ, დიდი პატივია...
- რა თქმა უნდა. ჩვენი კარიერა დასასრულს უახლოვდება. თუმცა ჩვენი შემცვლელები უკვე იზრდებიან. იმედი მაქვს, რომ “სამეფო კლუბის” ინჩასები თბილად მოგვიგონებენ.

- ესპანეთის ნაკრებში ასპარეზობას კვლავ აპირებ?
- რა თქმა უნდა, მსურს, რომ ევროპის ან მსოფლიო ჩემპიონატებზე მონაწილეობა მივიღო, თუმცა ამისთვის გუნდში კარგი ასპარეზობაა საჭირო. მით უმეტეს, ახლა, როდესაც ესპანეთი მსოფლიოს უძლიერეს ნაკრებად ჩამოყალიბდა და კონკურენციაც გაიზარდა.

- და ბოლოს, შენი საამსეზონო ნატვრა როგორია?
- როგორც ყოველთვის, პრიმერასა და ჩემპიონთა ლიგის ოქროს მედლები.

ინფორმაციის წყარო: RealMadrid.Com