ჩემპიონთა ლიგის მესამე ტურის დაპირისპირებამდე, ტრადიციულ პრესკონფერენციაზე, მთავარ მწვრთნელთან ერთად, კრიშტიანუ რონალდუსაც მოუწია ჟურნალისტების შეკითხვებზე პასუხის გაცემა.

გოლის აღნიშვნა „მალაგასთან:“ „რაც მოხდა შაბათს, ის დარჩა სტადიონზე.ადამიანებმა კარგად იციან ყველაფერი და ამიტომაც დამატებითი ახსნა-განმარტებები უადგილოა ჩემი მხრიდან.პრიმერას განვლილი ტური უკვე წარსულს ჩაბარდა.ახლა, სხვა გამოწვევის წინაშე ვდგავართ.“

გუნდის კონდიციები: „როგორც ხედავთ, „რეალი“ დღითი-დღე აუმჯობესებს თავის გამოსვლას.სეზონი უფერულად დავიწყეთ, მაგრამ დიდი ძალისხმევის შედეგად, თამაშიდან თამაშამდე პროგრესს განვიცდით.თითოეული ფეხბურთელი ვარჯიშზე ბოლომდე იხარჯება.“

პოზიციის შეცვლა: „ახალი მწვრთნელის პირობებში, ჩემი სათამაშო პოზიცია იგივე დარჩა.ვდგავარ იქ, სადაც ყველაზე კომფორტულად ვგრძნობ თავს.ანჩელოტიმ დიდი თავისუფლება მომცა მოედანზე, რაც მნიშვნელოვანია ჩემთვის.ზოგჯერ შუაში მიწევს გადასვლა, თუმცა ეს ამპლუის გამოცვლას არ ნიშნავს.“

„იუვესთან“ მატჩი: „ამ ეტაპზე 6 ქულა გვაქვს, რაც ბუნებრივია, შემდეგი ეტაპის საგზურს არ უდრის.ვფიქრობ, დიდ მატჩში მოგვიწევს მონაწილეობის მიღება, რომლის მოგებაც პრესტიჟის საკითხია.ვიცით, რომ „ფიორენტინასთან“ დრამატული შეხვედრის შემდეგ, „იუვე“ მაქსიმალურად შეეცდება მადრიდიდან ქულების წაღებას, თუმცა საკუთარი ქომაგების წინაშე მხოლოდ გამარჯვებისთვის ვითამაშებთ და კიდევ უფრო მივუახლოვდებით 1/8 ფინალს.“

ბეილი: „ჩემი აზრით, გარეთი პროგრესირებს.გამომდინარე იქედან, რომ პრე-სეზონი ფაქტიურად არ ჰქონია, თავიდან გაუჭირდა, თუმცა ყველაფერი გამოსწორებადია.ის ძალზედ მოტივირებულია და თავს არ ზოგავს ვარჯიშებზე.უკეთესი იქნება, უელსელზე ზეწოლას თუ შეწყვეტთ, რამეთუ ეს ვერ დაეხმარება ფორმის დაბრუნებაში.მჯერა, რომ ბეილი ბევრს მიაღწევს „რეალში.“

ანჩელოტისთან მუშაობა: „ვამაყობ, რომ ასეთი დამრიგებლისგან ვიღებ მითითებებს.სამეფო კლუბის ამჟამინდელი სამწვრთნელო შტაბი, კვალიფიციური და მაღალი დონის კადრებითაა დაკომპლექტებული.თავს ბედნიერად ვგრძნობ და ყველაფრის მოგება მინდა.გასახდელში ჩინებული ატმოსფეროა.ჩვენ ერთმანეთს ვეხმარებით.“

კასილიასის 3 თვიანი ვადა: „აღნიშნულ საკითხთან დაკავშირები ყველას საკუთარი აზრი გააჩნია, თუმცა საჯაროდ არ ვაპირებ მის დაფიქსირებას.როგორც ბოსმა თქვა, იკერი გუნდისათვის ძალიან მნშვნელოვანი ფიგურაა.“

კარლოს ტევესი: „მასთან ერთად დიდი ხნის განმავლობაში ვთამაშობდით „მანჩესტერში.“არგენტინელი საკმაოდ ძლიერი და სახიფათო ფორვარდია.მოხარული ვარ, რომ ისევ მომიწევს მასთან შეხვედრა, თუმცა წაგებას ვუსურვებ.“

as.com