ესპანური გამომცემლების ინფორმაციით გარეთ ბეილი უკვე რეალის ფეხბურთელია, სამეფო კლუბის ოფიციალური ვებ-გვერდის დასტური კი ჯერ-ჯერობით არსად ჩანს, თუმცა აღსანიშნავია, რომ უელსელი საკუთარი ბარგით ესპანეთში შენიშნეს, რის შემდეგაც მის გამადრიდელებაში 100%-ით დარწმუნდნენ...

"მარკას" ინფორმაციით ბეილი სამეფო კლუბში 10 მილიონ ევროს მიიღებს, მაგრამ ამ გასამრჯელოს გამოაკლდება გადასახადები, რომელიც მან სახელმწიფოს უნდა გადაუხადოს, აქედან გამომდინარე ის სავარაუდოდ, დაახლოებით 8.5 მილიონს მიიღებს წლიურად და ერთ-ერთი ყველაზე მაღალანაზღაურებადი ფეხბურთელი გახდება "მერენგების" რიგებში.

სატრანსფერო თანხად 97 მილიონი ევრო სახელდება, თუმცა ჯერ-ჯერობით უცნობია ეს ინფორმაცია რამდენად შეიძლება, რომ სანდოდ მივიჩნიოთ, მომდევნო კვირაში უელსელის შესახებ ყველა დეტალი ცნობილი იქნება, რადგან კვირის ბოლოს სატრანსფერო ფანჯარა იხურება.