ინგლისში გავრცელებული ინფორმაციის მიხედვით მერსისაიდული ლივერპული რაულ ალბიოლს აკვირდება და ზაფხულის სატრანსფერო ფანჯრის დროს მის გადაბირებას შეეცდება...

როგორც ჩანს ინგლისელებს დაცვის გაძლიერება სურთ, იდეალურ კანდიდატად კი რაულ ალბიოლი მიაჩნიათ, რომელიც სამეფო კლუბში ნამდვილად უდიდეს რეგრესს განიცდის, განსხვავებით წინა წლებისგან, როდესაც იგი რიკარდო კარვალიოსთან ერთად დაცვის ცენტრის უცვლელი წევრი გახლდათ.

რაულმა ადგილი ესპანეთის ეროვნულ ნაკრებშიც დაკარგა, მიზეზად კი სწორედ სათამაშო პრაქტიკის უქონლობა და ფორმიდან ამოვარდნა სახელდებოდა, აქედან გამომდინარე ესპანელისთვის ინგლისში გადასვლა იდეალურ ვარიანტად შეგვიძლია მივიჩნიოთ, რადგან იქ მას გაცილებით მეტი სათამაშო დრო ექნება.