ბოლო დროს ანჩელოტიმ მრავალჯერ უარყო ფაქტი, რომ მას რაიმე სახის მოლაპარაკებები აქვს სხვა კლუბთან, მაგრამ ესპანური პრესა დაჟინებით განაგრძობს ახალ-ახალი ინფორმაციის შემოთავაზებას.

არავინ იცის სიმართლეს შეესაბამება თუ არა ეს ყველაფერი, მაგრამ Cadena Cope-ს ჟურნალისტი ამტკიცებს, რომ სამეფო კლუბსა და იტალიელ მწვრთნელს შორის შეთანხმება უკვე მიღწეულია და კარლო დათანხმდა თეთრების შეთავაზებას. მათივე განმარტებით ეს ყველაფერი აპრილის მიწურულს მოხდა, რადგან ანჩელოტის კონტრაქტში იყო პუნქტი, რომლის მიხედვითაც თუ ის პსჟ-ს დატოვებას გადაწყვეტდა, სხვა კლუბთან კონტრაქტი აპრილში უნდა გაეფორმებინა, რათა უსასყიდლოდ წასულიყო საფრანგეთის დედაქალაქიდან.

Daily Telegraph კი ავრცელებს ინფორმაციას, რომ პარის სენტ ჟერმენის თავკაცად არსენ ვენგერი დაინიშნება, რომელმაც მრავალწლიანი ლონდონური ვოიაჟის შემდეგ სამშობლოში დაბრუნება გადაწყვიტა. ჟოზე მოურინიო კი ლონდონის ჩელსის დაუბრუნდება.