დღეს ნოუ კამპი მსოფლიოში ყველაზე დიდ კინოთეატრად გარდაიქმნება. მწვანე მინდორზე გამოვლენ მსოფლიოს საუკეთესო ფეხბურთელები. ყველა დროის საუკეთესო ბლოკბასტერს კი კინოთეატრის სკამებიდან 98 000 გულშემატკივარი მიადევნებს თვალს.

ჩვენ ვიხილავთ კლასიკურ ფილმს, რომელიც ერთი კატეგორიის მაყურებლისათვის დრამა იქნება, მეორესათვის კი კომედია. შევხვდებით ფანტასტიკის ჟანრსაც, რომელსაც მსახიობები თავისი უბადლო თამაშით შემოგვთავაზებენ. ფილმში მონაწილეობას მიიღებენ თავისი საქმის სპეციალისტები, იქიან აკრობატები, ვნახავთ კეთილისა და ბოროტის დაპირისპირებას, დაცემას, აღზევებას, ხელჩართულ ბრძოლას, სიძულვილს, მეგობრობას და სპეც ეფექტებს...

საუკეთესო რეჟისორი: ხორდი როურა ფილმით - ”ზუსტად შუადღეს” ან ჟოზე მოურინიო ფილმით - ”გატეხილი გულის უღელტეხილის”

დღეს გაიმართება ესპანური ფეხბურთის ოსკარის დაჯილდოვება. ტიტო ვილანოვას წარმომადგენელი ნოუ კამპზე იქნება ხორდი როურა, სწორედ ის იქნება ნომინირებული საუკეთესო რეჟისორის კატეგორიაში, რაღა თქმა უნდა ჟოზე მოურინიოსთან ერთად. წინა შეხვედრაში მან არაფერი არ შეიმჩნია და დადგა ფილმი ”ზუსტად შუადღეს”. მოურინიო კი შეეცდება გადაიღოს კინო სახელად ”გატეხილი გულის უღელტეხილი”, რომელშიც თავისი კლასიკური მტრის ქანდაკებას მისივე ტერიტორიაზე დაამხობს. მას არ შეეშინდება არც ნოუ კამპის დაბურული უღელტეხილების.

წლის საუკეთესო მამაკაცი მსახიობი: ლიონელ მესი ფილმში - ოქროს ბავშვი ან კრიშტიანო რონალდო ფილმში - ტერმინატორი

საუკეთესო მამაკაც მსახიობებად ნომინირებულნი არიან ლიონელ მესი, ბარსელონას ოქროს ბიჭუნა და მადრიდის რეალის ტერმინატორი კრიშტიანო რონალდო. კატალონიელების მთავარი იმედი ბოლო პერიოდში უღიმღამოდ გამოიყურება, მაგრამ მას შეუძლია გაიბრწყინოს და აბრჭყვიალდეს. თეთრი ტერმინატორი კი ძალას იკრეფს და მზად არის სრულად გაანადგუროს მტერი.

საუკეთესო მსახიობები: ინიესტა ფილმიდან - ადამიანი ლამანშიდან და მესუთ ოზილი ფილმიდან - ჯადოქარი ოზების ქვეყნიდან

ადამიანი ლამანშიდან შეეცდება მადრიდის რეალის მცველებს შორის გაძრომას ისე, თითქოს მგლებთან ცეკვავდეს. ჯადოქარი ოზების ქვეყნიდან კი შეეცდება წვეულების მეფე გახდეს და კონცერტის მთავარი აღმოჩენის ტიტული მოიპოვოს.

საუკეთესო მეორეხარისხოვანი როლის შემსრულებელი მსახიობი: ჩავი - პატარა პრინცი და ალონსო - ალქიმიკოსი

ბარსელონას პატარა პრინცი ჩავი შეეცდება, წარუძღვეს გუნდს თავისი ბრწყინვალე გონებით და გამარჯვებამდე მიიყვანოს ის. თუმცა მტერსაც ჰყავს ნათელი გონება, რომელიც ალქიმიკოსია და მადრიდის რეალის ნამდვილი საყრდენია თავისი უნაკლო ასპარეზობით.

ეჭმიტანილები თუ შემთხვევითი გმირები?

საუკეთესო სპეციალისტის ნომინანტებად განიხილავენ მეკარეებს დიეგო ლოპესი და პინტო. ორივე მათგანი შეიძლება მსაჯის სასტვენის შემდეგ აღმოჩნდეს ეჭვმიტანილის ან შემთხვევითი გმირის ნომინაციაში გამარჯვებული.

იაპონური რესტორნის სცენა ფილმიდან ”მოკალი ბილი”

ფართო მოქმედების ნომინაციაში საუკეთესო მსახიობებად ნომინირებულნი არიან: არბელოა, რამოსი და პეპე მადრიდის რეალიდან, ბუსკეცი, ალვეში და პიკე კი ბარსელონადან. სწორედ მათ შესწევთ ძალა საფეხბურთო მოედანი გადააქციონ ვესტერნად, სწორედ ისეთად, როგორიც არის იაპონური რესტორნის სცენა ფილმიდან ”მოკალი ბილი”.

მოწვეული მსახიობი, უნდიანო მალენკო ფილმიდან - სასიკვდილო სურვილი

უნდიანო მალენკო მოწვეული სტუმრის როლში იქნება და წესით ისეთივე ნეიტრალური უნდა იყოს, როგორც შვეიცარია, მაგრამ არის სერიოზული საფრთხე იმისა, რომ გახდეს აღმასრულებელი. მის ქმედებებს მიკროსკოპის ქვეშ დააკვირდებიან.

მოიმარაგეთ პოპკორნი და კომფორტულად მოთავსდით სავარძელში

სანდრო როსელი და ფლორენტინო პერესი აღმასრულებელი პროდუსერების ნომინაციიაში გამარჯვებისათვის იბრძოლებენ. მოთავსდებიან სავარძელში და დააკვირდებიან რომელი მოიგებს უფრო მეტ ოსკარს, რეალი თუ ბარსელონა? დღეს ზუსტად 21:00 საათზე ჩაბნელდება კამპ ნოუ და მთელი ყურადღება მწვანე ხალიჩისაკენ იქნება მიმართული. ჩვენ კი რაღა დაგვრჩენია? მოვიმარაგოთ პოპკორნი, კომფორტულად მოვთავსდეთ სავარძელში და ყურადღებით მივადევნოთ თვალი ესპანური ფეხბურთის ოსკარის დაჯილდოვებას.

პ.ს. სტატია მომზადდა ესპანური გამომცემლობა Marca-ს ჟურნალისტის მიერ, მე კი უცვლელად გთავაზობთ მას.