ძალიან ბევრი ვიფიქრე სტატიის სათაურზე და ბოლოს ეს მოვიფიქრე. არ ვიცი რამდენად მოგეწონებათ ან დამეთანხმებით, მაგრამ გუშინდელი შეხვედრის შემდეგ სწორედ ასეთი ასოციაცია გამიჩნდა: ანარქისტი, რომელიც მოქმედებს თავისი გამჭრიახი გონებით და ყოველთვის ჩვეული სიმშვიდით უმკლავდება სირთულეებს, თითქოს ყველაფერი კარგად გათვლილი და დიდი ხნის დაგეგმილი ჰქონდეს, აი ასეთია მადრიდის რეალის V ანუ ვარანი.

პირველ რიგში მომხმარებლებს და მწერლებს მინდა მივმართო, ამ ფეხბურთელის გვარი არ არის ვარანე და თუ ელ კლასიკომდე მასზე არაფერი გსმენიათ, მინიმუმ ამ მატჩის შემდეგ იმსახურებს ისე მივმართოთ, როგორც მისი გვარი რეალურად ჟღერს.

უმრავლესობას ნანახი გექნებათ ფილმი V For Vendetta, როგორც შესავალში აღვნიშნე რაფაელი სწორედ ამ ფილმის პერსონაჟს მაგონებს, არა მარტო იმით, რომ მისი გვარი V-ზე იწყება, არამედ მისი შეუპოვარი ბრძოლით სისტემის დასანგრევად, სისტემის, რომელსაც კატალონიური ბარსელონას ჰეგემონია და ბატონობა ჰქვია. ის იბრძვის უკომპრომისოდ, მთავარი მიზანი დასახული მიზნის შესრულება არის და ნებისმიერ ფასად გააკეთებს ამას. რაც მთავარია ის არ სცდება კორექტულობის ფარგლებს და ესეც თავისმხრივ ელ კლასიკოს ანარქიაა, რადგან მცველი, რომელიც ასე სუფთად თამაშობს, მითუმეტეს მადრიდის რეალის მხრიდან.

ბარსელონასა და სამეფო კლუბის დაპირისპირება დიდ ინტრიგას იწვევს გულშემატკივრები, ფეხბურთელები კი ამ შეხვედრის წინ ენით აღუწერელ ზეწოლას განიცდიან, ესპანეთში და საერთოდ მსოფლიოს მასშტაბით ერთ-ერთი ყველაზე დიდი მოვლენაა ყოველი ელ კლასიკო, მოურინიომ კი ამ შეხვედრაში 19 წლის გამოუცდელი ვარანი დააყენა ძირითად შემადგენლობაში, მის მეწყვილედ კი რიკარდო კარვალიო დააყენა, ხოლო ალბიოლი სათადარიგოზე დატოვა. როდესაც გუნდები მწვანე მინდორზე გამოვიდნენ, ვარანს ეტყობოდა, რომ ცოტათი ნერვიულობდა, რადგან მის კარიერაში ამ ეტაპისათვის ყველაზე საპასუხისმგებლო მომენტი იყო, ის ტიტანების შერკინებაში ძირითად შემადგენლობაში გამოჩნდა და თავად მიიღო ტიტანის სტატუსი. მიუხედავად ამ მცირედი ნერვიულობისა მის თვალებში ცეცხლი ენთო და მზად იყო შანსი სათანადოდ გამოეყენებინა. მსაჯის სასტვენის შემდეგ კი თინეიჯერი ბიჭუნას ნერვიულობა სადღაც გაქრა და გაჩნდა ჩამოყალიბებული, ზრდასრული ადამიანი, რომელიც ყოველ ნაბიჯს იუველირული სიზუსტით ზომავს და ბურთსაც მეტოქეს სწორედ ასე ართმევს, მის მიერ შესრულებული ყველა საფეხბურთო ილეთი იდეალურთან ახლოს იყო, მან სამაგალითო შეხვედრა ჩაატარა.

მატჩის დროს ერთ-ერთმა რუსმა კომენტატორმა განაცხადა: ”растет защитник топ класса!!!” წამყვანი შეცდა, ვარანი უკვე არის ტოპ-კლასის მცველი და ასე თუ გააგრძელებს ის იქნება იდეალური მცველი, ნაკლის გარეშე. მიუხედავად მისი ერთი შეხედვით მოქნელი აღნაგობისა, ძალიან სწრაფი და ელასტიურია, მისი სტილის მცველების მთავარი პრობლემა არის ფეხით თამაში. საჰაერო ორთაბრძოლებს ისინი კარგად იგებენ, მაგრამ როდესაც ბურთს იღებენ მერე არ იციან რა ქნან და არც პასი უვარგათ, რაფა კი ალბათ გამთამაშებლად რომ ათამაშო, საშუალოზე მაღალი დონის ფეხბურთელი იქნება, რადგან მისი გრძელი გადაცემების აბსოლუტური უმრავლესობა ზუსტია. ვიცოდი, რომ გუშინდელ შეხვედრაში დაცვის ცენტრში ვეტერანი და ახალგაზრდა ფეხბურთელები შეუწყვილდებოდნენ ერთმანეთს. პირველად რომ მეყურებინა ფეხბურთისთვის, ვიფიქრებდი, რომ ვეტერანი ვარანია. ის ზრდასრული გონიერი ადამიანის შთაბეჭდილებას ტოვებს და წარმოადგენს იმ ფეხბურთელთა კატეგორიას მიეკუთვნება, რომელთა სათამაშო IQ ძალიან ძალიან მაღალია, დაახლოებით ისეთი, როგორიც ზინედინ ზიდანის.

ვარანზე შეიძლება უსასრულოდ ისაუბრო ადამიანმა, მაგრამ არ მინდა მოვლენებს წინ გავუსწრო, მართლაც რომ უნიკალური მცველი ყავს მადრიდის რეალს და მას აუცილებლად უნდა ”მიხედონ”, რადგან დღეს უკვე მასზე მთელი საფეხბურთო სამყარო საუბრობს, ეს კი 19 წლის ბიჭისთვის ცოტათი საშიშია, მაგრამ ვარანი მხოლოდ პასპორტით არის 19 წლის, ისე კი ის ვეტერანია...

აი ასეთია ზიდანის პროტეჟე მადრიდის რეალში, ჩვენი პატარა ანარქისტი, ჩვენი V.