Sport Mediaset-თან ინტერვიუში მარკო მატერაციმ ისაუბრა ჟოზე მოურინიოსთან მისი ”ინტერში” ყოფნის პერიოდში ურთიერთობაზე და ასევე შეეხო მასსა და ზიდანს შორის მომხდარ ინციდენტსაც:

”მოურინიო ნომერი პირველი იყო. მისი საიდუმლო არის იმაში, რომ აგრძნობინებს ყველას , თითქოსდა ისინი პროექტის მნიშვნელოვანი ნაწილები არიან. მადრიდში, როცა მითხრა ჟოზემ, რომ გვტოვებდა, მე ვუთხარი: ”ჯანდაბა, შენ , შენ მე ბენიტესის ხელში მტოვებ?”. მე ვიცოდი, რომ თუ ის დაგვტოვებდა, უწინდებური გუნდი ვერასდროს ვერ გავხდებოდით.”

”ბენიტესთან საქმეები კარგად არ აგვეწყო. მე ჩემს მთლიან კარიერაში ორ უმნიშვნელოვანეს მომენტს გამოვყოფდი. ესაა ”ინტერში” ჩემი თამაში მოურინიოს ხელმძღვანელობის ქვეშ და იტალიის ეროვნულ ნაკრებში ჩემი გამოსვლა ლიპის ხელმძღვანელობსი ქვეშ. ბენიტესი მათ შორის არ არის. ბენიტესმა ცადა ამ ყველაფრის მოშორება და დასამარება. ეს ასეც ხდება, ვინაიდან როცა ახალი სისხლი მოდის, ისინი მუდამ ძველის ჩრდილის ქვეშ მოქცევის შიშით ცდილობენ წარსულის დასამარებას.”

როცა თხოვეს საუკეთესო ფეხბურთელიდ აესახელებინა, ვისთანაც კი ოდესმე უთამაშია, მან ყველასგან მოულოდნელად მათ შორის ზიდანი დაასახელა: ”ჟულიო სეზარი, მაიკონი, კანავარო, მე და კივუ უკანა ფლანგზე. გატუზო, სტანკოვიჩი და დე როსი ცენტრში, კასანო და ზიდანი თავდამსხმელის უკან. ეტოო შეტევაში.”

”რატომ ზიდანი? ვინაიდან მას თავისი ადგილი აქვს ჩემს გულში. მან მე მსოფლიო თასის ჩემპიონი გამხადა. მე ყველაფერი დამავიწყდა და მხოლოდ ტიტულის აწევა მახსოვს. მიუხედვად ყველაფრისა, მე მასთან სიამოვნებით ვითამაშებდი. ის ხუთ საუკეთესოს შორისაა.”