როგორც იცით, ხოსე მარია კალეხონი 25 წლისაა, თუმცა ჯერ-ჯერობით იგი ნაკრებში არ გამოუძახებიათ. გრანადელი ფეხბურთელი "ფურია როხას" 21 წლამდელთა ნაკრებში გამოდიოდა, სადაც 5 მატჩი ჩაატარა. სადებიუტო შეხვედრაში, 2008 წელს, ყაზახეთის წინააღმდეგ, იგი მეორე ტაიმის დასაწყისში შემოვიდა და 15 წუთში გოლის გატანაც მოახერხა. როგორც იცით, ხოსე მარია "ესპანიოლში" წარმატებით გამოდიოდა, თუმცა მან დელ ბოსკეს გული მაინც ვერ მოიგო.

ცხადია, კალეხონი "რეალის" ძირითად ფეხბურთელად არ განიხილება, თუმცა გუნდში მნიშვნელოვანი ფიგურაა, რამეთუ წინა სეზონში იგი ხშირად გამოდიოდა მოედანზე. მან რამდენიმე გოლის გატანაც მოახერხა. სავარაუდოდ, წლევანდელ სეზონში ხოსე მარიას გაცილებით მეტი მოვალეობები დაეკისრება და შეეძლება თავი მოაწონოს ეროვნული ნაკრების მწვრთნელს.

დღესდღეობით ნაკრებში მის ძირითად კონკურენტებად პედროსა და ხესუს ნავასს მიიჩნევენ, თუმცა ესპანელი ექსპერტების აზრით კალეხონს არ უნდა გაუჭირდეს მათთან ჭიდილი. ისინი მიიჩნევენ, რომ გრანადელის ნაკრებში გამოძახება უახლოეს მომავალში მოხდება, მეტიც ფიქრობენ, რომ კალეხონი მსოფლიოს 2014 წლის ჩემპიონატის შემადგენლობის ერთ-ერთი მთავარი კანდიდატი იქნება...