გონსალო იგუაინის მომავალი ბურუსით არის მოცული. თავად ფეხბურთელი აცხადებს, რომ არსად არ სურს წასვლა და მხოლოდ მადრიდთან ერთად ტიტულების მოგებაზეა ორიენტირებული, მაგრამ დღე არ გავა, რომ მსოფლიო საინფორმაციო წყაროებში არგენტინელზე ახალი "News" არ გავრცელდეს...

მოგეხსენებათ, პიპას შეძენით ტურინის იუვენტუსი, მანჩესტერ სიტი, ტოტენჰემ ჰოტსპური, მილანის ინტერი და საფრანგეთის პსჟ ინტერესდებიან, დღეს გავრცელებული ინფორმაციით კი ზაფხულში რომან აბრამოვიჩიც გეგმავს გააქტიურებას და პიპიტას შესაძენად ყველაფრის გაკეთებას.

არგენტინელი ფორვარდი ძალიან მოთხოვნადი მას შემდეგ გახდა, რაც იგი კარიმ ბენზემამ დაჯაბნა და სასტარტო თერთმეტეულში გარანტირებული ადგილი წაართვა. მიუხედავად იმისა, რომ ფრანგი ფორვარდის ტრავმიანობის დროს იგუაინი ახერხებდა გოლების გატანას, ჟოზე მოურინიო უპირატესობას მაინც "9"-იანს ანიჭებს, ამან აგორებული ჭორები კიდევ უფრო საფუძვლიანი გახადა.

Daily Mail-ზე დაყრდნობით ლონდონელ არისტოკრატთა მფლობელი გონსალო იგუაინის სანაცვლოდ 37 მილიონ ევროს ამზადებს, რაც ნამდვილად არ არის პატარა თანხა, მაგრამ შეელევიან თუ არა მადრიდელები მოთამაშეს, რომელსაც კრიშტიანო რონალდოს შემდეგ ყველაზე მეტი გოლი აქვს გატანილი, უკვე სხვა საკითხია.

P.S ჩემი მე-2000-ე სტატია HalaMadrid.Ge-ზე