მადრიდის "რეალის" მთავარმა მწვრთნელმა, ჟოზე მოურინიომ პრესკონფერენცია გამართა. პორტუგალიელმა გუშინდელ მატჩზე ისაუბრა, სადაც მისმა გუნდმა "ბარსელონასთან" უმნიშვნელოვანესი მარცხი იგემა.

"ჩვენ გუშინ არ გაგვიმართლა. ეს არის ფეხბურთი, სადაც შეიძლება ყველაფერი მოხდეს და სწორედ ამის ნათელი მაგალითი გუშინ ვიხილეთ. პირველი ტაიმი ძალიან კარგად და დინამიურად მიმდინარეობდა ჩვენთვის. კრიშტიანუ რონალდუს შეეძლო სხვაობა ორ ბურთამდე გაეზარდა, თუმცა სამწუხაროდ პორტუგალიელმა ეს ვერ მოახერხა. მეორე ტაიმის დასაწყისი ისეთივე იყო, როგორიც ეს პირველ ნახევარში. უკვე ავღნიშნე, რომ ფეხბურთში ყველაფერი ხდება და ეს დამტკიცდა კიდეც. საკუთარ კარში მივიღეთ გოლი, რომელიც სრულიად მოულოდნელი და კურიოზული იყო".

"ერთი სიტყვით, ჩვენ ვერ გამოვიყენეთ ისეთი შანსები, რომლებსაც შესაძლოა მატჩის ბედი გადაეწყვიტა. საერთო ჯამში ბიჭებმა კარგად ითამაშეს, თუმცა იღბალი ჩვენ მხარეს არ ყოფილა. გამარჯვებაში უდიდეს როლს, სწორედ იღბალი ასრულებს, რაც მადრიდის "რეალს" ნამდვილად აკლდა. პირველივე გოლი შეცდომის ხარჯზე გავუშვით, ეს კი კატალონიელებმა ძალიან კარგად გამოიყენეს".

"დედაქალაქელებსა და კატალონიელებს თანაბრი ქულები აქვთ, თუმცა ჩვენ რეზერვში ერთი მატჩი გვაქვს, რომლის მოგების შემთხვევაშიც, ზამთრის ჩემპიონები ვიქნებით, ამისათვის უდაოდ ძლიერი კონკურენტის "სევილიის" დამარცხება მოგვიწევს. მესიმ საკმაოდ უხეშად თამაშა ალონსოს წინააღმდეგ და ვფიქრობდი, რომ იგი გაძევებას იმსახურებდა, მაგრამ ბორბალანმა სხვაგვარად გადაწყვიტა. ამ მომენტს 40–50 მეტრიდან ვუცქერდი, ხოლო არბიტრი 3–4 მეტრში იყო. გადაჭრით არაფრის თქმა არ შემიძლია, ვინაიდან შესაძლოა მსაჯისადმი ბრალდება უსაფუძვლო აღმოჩნდეს".

"მსურდა, რომ გუნდს მეორე ტაიმშიც შემტევი და ლაღი ფეხბურთი ეჩვენებინა, ისე როგორც ეს პირველ ტაიმში იყო. სამწუხაროდ ამან ვერ გაამართლა, რასაც ტაბლოზე ნაჩვენები შედეგიც მიგვითითებს. წინა სეზონში ჩვენ ბევრი უსამართლობა ავიტანეთ. გაძევებული ფეხბურთელები, არ ჩათვლილი გოლი, მაგრამ რაც ყველაზე მთავარია "კოპა დელ რეიში" გავიმარჯვეთ. ეს გამარჯვება ძალიან მნიშვნელოვანი და სასიხარულო იყო, მაგრამ უნდა ვაღიაროთ, რომ "ბლაუგნარა" დღეს "ბლანკოსზე" ძლიერი კლუბია, რაც "კლასიკომ" დაადასტურა. ცხადია, ჩვენ გავაგრძელებთ მუშაობას და იმედია ამ გაკვეთილით, ბევრს ვისწავლით".

Realmadrid.com