"მარსელის ოლიმპიკმა" საფრანგეთის ჩემპიონატის მე-7 ტურში მარცხი განიცადა.ფრანგები "რეალთან" მატჩს არცთუ ისე კარგ განწყობაზე შეხვდებიან.

დიდიე დეშამის შეგირდებმა "ვალენსიენს" ვერაფერი მოუხერხეს სტუმრად.მიუხედავად იმისა, რომ ისინი თამაშის მსვლელობისას ორჯერ იგებდნენ, ეს მაინც არ აღმოჩნდა საკმარისი გამარჯვების მოპოვებისათვის.ტაბლოზე საბოლოო ანგარიში 3-2 დაფიქსირდა, მასპინძლების სასარგებლოდ ("მარსელიდან" თავი მორიენტესმა და ნიანგმა გამოიჩინა).

შვიდი ტურის შემდეგ, "ოლიმპიკი" 14 ქულით მესამე ადგილს ებღაუჭება.მათ აქტივში 12 გატანილი, ხოლო 7 გაშვებული გოლია.დეშამის ბიჭები ლიდერ "ლიონს" მხოლოდ სამი ქულით ჩამორჩებიან.

"მარსელის" შემადგენლობა აღნიშნულ შეხვედრაში: მანდანდა, ბონარი, ჰაინცე, დიავარა, რული, სისე (ვალბუენი), რუჩო, შეირუ, ნიანგი (ბენ არფა), მორიენტესი (აბრიელი) და ბრანდაო.

"თეთრები" 30-ში დაუპირისპირდებიან ფრანგებს."მარსელის" წინაშე ძალზედ რთული ამოცანა დგას.