- “ესპანიოლის” წინააღმდეგ სასტარტოში ხომ არ იქნები?
- მაგ კითხვით მთავარ მწვრთნელს მიმართეთ, ისე უარს ნამდვილად არ ვიტყოდი. როგორც გითხარით, საბოლოო სიტყვა პელეგრინიზეა. მე კი, ბევრი მუშაობა მმართებს, რათა ჩილელი სპეციალისტი საკუთარ შესაძლებლობებში დავარწმუნო.

- შენი ჩვეულებრივი დღე როგორია?
- ამჟამად გამოცდებს ვაბარებ. უახლოეს კვირებში ტესტები უნდა დავწერო. შარშან ამ გამოცდებში ჩავიჭერი, რაც აღარ უნდა განმეორდეს. დღესაც, თუ დრო დამრჩა, ვიმეცადინებ.

- ოთხშაბათს, ესპანეთის ნაკრების თამაშს თვალყურს, ალბათ, მიადევნებ.
- რა თქმა უნდა. მშობლიური ნაკრების მატჩების ყურება ჩემთვის ტრადიციასავითაა. ბელგიასთან შეხვედრამ კრიტიკოსებისა და ინჩასების ყველა ეჭვი გაფანტა. ესპანეთი ძველებურ ფორმას უბრუნდება.

- როგორ ფიქრობ, ნაკრებში მალე გამოგიძახებენ?
- ამ ეტაპზე ეგ ჩემი უმთავრესი მიზანი არ არის, თუმცა მეც იმ ფეხბურთელთა რიგებში ვარ, რომლებიც ეროვნული გუნდის ღირსების დაცვას უდიდეს მნიშვნელობას ანიჭებენ. დამეთანხმებით, რომ ჯერჯერობით უმჯობესია “რეალში” დავმკვიდრდე, დანარჩენი კი, შემდეგ თავისით მოვა.

- საკუთარი ძალების წარმოსაჩენად რეგულარული თამაში დაგჭირდება...
- შეკრებაზე რამდენიმე შეხვედრაში მივიღე მონაწილეობა და პელეგრინიც კმაყოფილი დარჩა ჩემი ასპარეზობით. სეზონი ახალი დაწყებულია და ძირითადი შემადგენლობა ჯერჯერობით ჩამოყალიბების სტადიაშია. ბევრი რამ მაქვს დასამტკიცებელი. “რეალის” მოთხოვნილებებს უნდა ვაკმაყოფილებდე, წინააღმდეგ შემთხვევაში, მშობლიური გუნდის დატოვება მომიწევს.

- კლუბში როგორ მიგიღეს?
- ვალდანომ გასაგებად ამიხსნა, რომ გუნდს ვჭირდებოდი და საკუთარი შესაძლებლობები მთავარი მწვრთნელისთვის უნდა დამემტკიცებინა. მოკლედ, მთლიანად საკუთარ თავზე ვარ დამოკიდებული.

- მანუელ პელეგრინის ესაუბრე?
- კონტრაქტს ხელი როგორც მოვაწერე, მანუელს მაშინვე შევხვდი. იგივე მითხრა, რაც ვალდანომ. ამიხსნა, რომ ჩემი იმედი ჰქონდა. მისი დიდად მადლიერი ვარ, რადგან ყოველთვის პირდაპირ მესაუბრება.

- რა სათამაშო კომპონენტებში მოიკოჭლებ?
- ბევრი რამ მაქვს დასახვეწი და დროც საკმარისად მაქვს ამისთვის.

- “რეალის” ფეხბურთელობა რამდენად მძიმე ფსიქოლოგიური ტვირთია?
- ერთი შეხედვით რთულია, მაგრამ პირადად მე, აქ ერთი სეზონის გასატარებლად არ მოვსულვარ. ყველა მოთამაშეს ძირითადში მოხვედრის თანაბარი შანსი აქვს. ყველაფერი მონდომებასა და საკუთარი თავის რწმენაზეა დამოკიდებული.

- სულ მალე ვნახავთ პელეგრინი, გვარდიოლას მსგავსად, ახალგაზრდებს შანსს მისცემს თუ არა.
- “ბარსელონაში” იდეალური ახალგაზრდული სისტემაა. “რეალშიც” საკმაოდ ბევრი ცვლილება მოხდა, რის შედეგსაც უახლოეს მომავალში დავინახავთ. ყოველ შემთხვევაში, “კანტერანოსებს” თავის გამოჩენის შანსი ექნებათ. ხშირად მთავარ გუნდში დამკვიდრება რთულია, თუმცა თუ მწვრთნელი გენდობა, მაშინ არც ეს იქნება გადაულახავი ბარიერი.

- ახალ სათამაშო სტილს როდის შეეგუებით?
- შეკრებაზე ძალიან კარგი შთაბეჭდილება დავტოვეთ. თუმცა საუკეთესო ფორმაში ჯერ ვერ შევალთ. ყველაფერი გარკვეული ეტაპის გადალახვის შემდეგ ხდება. ახლა ამას არავინ ელის და არც არავინ მოითხოვს.

- ყველაზე მეტად რომელ პოზიციაზე გიადვილდება ასპარეზობა?
- ამპლუით გამთამაშებელი ვარ, რომელიც ფორვარდების უკან ასპარეზობს. თუმცა ფლანგებზეც არ მიჭირს თამაში. მოკლედ, სადაც მწვრთნელი გადაწყვეტს, იქ ვიასპარეზებ.

- “ალ-იტიჰადთან” შეხვედრაში, ინჩასები ფეხზე წამოგიდგნენ. რა იგრძენი მაშინ?
- ფანები დიდებულად დამხვდნენ, როგორც მოედანზე, ასევე მის გარეთ. ხალხი მაფასებს იმიტომ, რომ 8 წლის ასაკიდან “რეალში” ვთამაშობ. მეც რაღაც განსაკუთრებულს ვგრძნობ, როცა “სამეფო კლუბის” მაისურით ვასპარეზობ. “ბლანკოსის” აკადემიაში ბავშვებს გამარჯვებულის მენტალიტეტს უნერგავენ, რაც დიდად დაგვეხმარა “რეალის” ყველა აღზრდილს.

- ამ წელს თქვენგან ყველაფრის მოგებას ელიან. ამ ფაქტს როგორ ეგუებით?
- “რეალის” ფანები გამარჯვებას მიჩვეულნი არიან. ჩვენც კარგად გვესმის მათი. სეზონის ტიტულით დასრულება რთული იქნება, მაგრამ არა შეუძლებელი. ფანების ფაქტორიც გასათვალისწინებელია. საკამოდ გამოცდილი გუნდი გვყავს, რომელსაც ყველა ტიტულისთვის შეუძლია ბრძოლა. მოთამაშეები თითოეულ მატჩში ბოლომდე უნდა დაიხარჯნონ.

ინფორმაციის წყარო: RealMadrid.Com