კატალონიის "ბარსელონამ", ყველასაგან მოულოდნელად ვერ მოიგო "სპორტინგთან" შეხვედრაში, ეს შანსი კი "რეალის" მოთამაშეებმა გამოიყენეს და "ლურჯ–წითლებთან" სხვაობა ხუთ ქულამდე შეამცირეს. გთავაზობთ ლიონელ მესისა და კრიშტიანუ რონალდუს შედარებას, 23–ე ტურის მიხედვით.

ლიონელ მესიმ ვერ გამოიჩინა თავი "სპორტინგთან" შეხვედრაში, თუმცა მის ანგარიშზე ერთი საგოლე გადაცემაა. ვილამ შესანიშნავი გოლი გაიტანა, არგენტინელის ასისტენტობის საშუალებით. კატალონიელთა 10 ნომერი ფლობდა ბურთს, მაგრამ მეტოქეები მას საჯარიმოში არ უშვებდნენ. ფორვარდს ჰქონდა გოლის შეგდების შანსი, ისევე როგორც კრიშტიანუ რონალდუს. პორტუგალიელის ანგარიშზეც ერთი საგოლე გადაცემაა, თუმცა იგი ლეოსგან განსხვავებით გაცილებით აქტიური იყო. 7–მა ნომერმა ადებაიორს საგოლე გადაცემები გაუკეთა, მაგრამ ტოგოელმა თავდამსხმელმა ვერცერთი შანსი ვერ გამოიყენა. თავად მეგა–ვარსკვლავსაც ჰქონდა კარლოს კამენის კარის დალაშქვრის შანსი.