გასულ დუელში მან იმედი არავის გაუცრუა. როდესაც მთელი მოედანი დუმდა, იგი უშიშრად მიაბიჯებდა მეტოქის კარისკენ, ის იყო მაგალითი ყველასთვის... მან ყველას თვალნათლივ დაანახა, თუ რას ნიშნავს ბოლომდე ბრძოლა, ის იყო ნამდვილი 'თეთრი სიამაყე'.

მადრიდის "რეალმა" თამაში საშინლად დაიწყო, "თეთრები" მეტოქის იერიშებს უპასუხოდ ტოვებდნენ. გასულ მატჩში კიდევ ერთხელ გამოიკვეთა მადრიდელთა სუსტი წერტილები უკანა ხაზში... ჟოზეს 'გამადრიდისტების' შემდეგ სამეფო კლუბის დაცვის ხაზში პროგრესი ნაკლებად იგრძნობა, სამაგიეროდ ნათლად გამოიკვეთა გუნდი, რომელიც არა ინდივიდუალური ოსტატობის ხარჯზე იგებს მატჩებს, არამედ გუნდური სულისკვეთებით.

ბორხა ვალერომ და "ყვითელი წყალქვეშა ნავის" კამპანიამ შეხვედრის დებიუტში ბწყინვალე თამაში აჩვენა. სანტი კასორლა ნახევარდაცვის ხაზში ბრწყინავდა, როსი და მარკო რუბენი კი მადრიდელთა ფლანგებზე დომინირებდნენ.

მატჩი მჭიდრო ბრძოლათა ფონზე მიმდინარეობდა. სანტი კასორლას შესანიშნავ გადაცემას კანიმ უპასუხა, რომელმაც მეტოქის კარი მეტად მოხდენილი დარტყმით აიღო. იკერ კასილასის მოულოდნელობით აღსავსე მზერა შეხვედრის არასახარბიელო სიმპტომებს მოასწავებდა.

სტუმართა ენერგიული სტარტი მოჩვენებითი გამოდგა, მადრიდელებმა მეტოქის კარი რამოდენიმე წუთში აიღეს... კარიმ ბენზემას ბრწყინვალე გადაცემას მესუტ ოზილი გამოეხმაურა, რომელმაც კარის საპირისპიროდ მოძრავი კრიშტიანო რონალდო შენიშნა, გერმანელმა ნახევარმცველმა პასი არ დააყოვნა და პორტუგალიელმა ვინგერმა ანგარიში საყაიმო გახადა.

მარკო რუბენმა ლასს ბურთი აართვა, მან კარგი პასი მიაწოდა თანაგუნდელს, ხელოვნური თამაშგარე მდგომარეობის დაფიქსირებას ლამობდა რაულ ალბიოლი, რომელიც საბოლოო ჯამში შეცდა, ვერც იკერ კასილასმა მოახერხა საკუთარი კარის გადარჩენა, მეკარესთან პირისპირ დარჩენილმა მარკო რუბენმა "ბლანკოსის" კარის ბადეში ბურთი ულამაზესი დარტყმით გაახვია. მაშ ასე, "ყვითელი წყალქვეშა ნავი" კიდევ ერთხელ დაწინაურდა.

'ბერნაბეუ' დუმდა, მოვლენები საოცრად განვითარდა, ისე როგორც გარიდო ყველაზე ტკბილ სიზმრებშიც ვერ წარმოიდგენდა. მიუხედავად იმისა, რომ მესუტ ოზილი გაუთავებლად ცდილობდა მეტოქის კარის დალაშქვრას, მადრიდელები სასურველი შედეგის მიღწევას ვერა და ვერ ახერხებდნენ. კარიმ ბენზემა "ჩვეულ" უსახურ სტილში აგრძელებდა ასპარეზობას, მარსელო კი თავისდაუნებურად საკმაოდ არასტაბილურად მოქმედებდა მარცხენა ფლანგზე.

ტაიმის ბოლოს მადრიდელებმა საოცარი კომბინაცია გაითამაშეს... "ვილიარეალის" კარის მიმართულებით ჯარიმა დაინიშნა, საჯარიმოს ნიშნულთან ორი მადრიდისტა, ჩაბი ალონსო და კრიშტიანო რონალდო იმყოფებოდნენ. კრიშტიანომ რაღაც ჩასჩურჩულა ჩაბის, შემდეგ პორტუგალიელი ჩუმად შეიპარა მეტოქის საჯარიმო მოედანში, მცველებს ოსტატურად დაუსხლტა, ამ ყველაფერს ალონსოს შესანიშნავი გადაცემა მოჰყვა, რომელსაც რონალდომ ძალიან ლამაზი თაურით უპასუხა და ანგარიში კიდევ ერთხელ გაათანაბრა...

პირველი ნახევრის ბოლოს საყაიმო ანგარიში ერთობ არასამართლიანობის გრძნობას იწვევდა "ვილიარეალის" გულშემატკივართა შორის, მაგრამ ფეხბურთი ლოგიკას თითქმის არასდროს ექვემდებარება, ახლაც ასე მოხდა...