მადრიდის "რეალში" გაურკვევლობა სუფევს. გუნდი ფორვარდების დეფიციტს განიცდის. ჟოზე მოურინიო სეზონის დასაწყისში გუნდის ხელმძღვანელებს ერთი პერსპექტიული ფორვარდის გადმობირებისკენ მოუწოდებდა. ის აცხადებდა, რომ კარიმ ბენზემასა და გონსალო იგუაინის გარდა გუნდს კიდევ სჭირდება ერთი თავდამსხმელი. პორტუგალიელი თავკაცის სიტყვებმა ფრთები ახლა შეისხა, მაშინ როდესაც პიპიტამ მძიმე ტრავმა მიიღო და ბენზემას ასპარეზი გაეხსნა...

საწყენია, როდესაც ისეთი კარგი ფეხბურთელი იღებს ტრავმას, როგორიც გონსალო იგუაინია. უნდა ვაღიაროთ, რომ არგენტინელი თავდამსხმელი ერთერთი საუკეთესოა თავის პოზიციაზე. კარიმ ბენზემას არ შეუძლია იგუაინის საფუძვლიანი დუბლიორობა. მიუხედავად იმისა, რომ ფრანგი ძალიან ნიჭიერი ფეხბურთელია, მას სამეფო კლუბისთვის სარგებლობის მოტანა ნაკლებად გამოსდის.

მეორე ასპექტი, რაც შეუმჩნეველი რჩება, ეს არის - "უნივერსალური" ფლორენტინო. პერესი თავის საქმის პროფესიონალია. დასამალი არაფერია იმაში, რომ ის თანხა რაც მან კარიმში გადაიხადა ჯერჯერობით უშედეგო გამოდგა. გასაკვირი არაფერია იმაში, რომ ფლორენტინოს ბენზემას იმედი ჯერაც არ დაუკარგავს და ამ ფეხბურთელის მიმართ დიდ სიმპათიებსაც განიცდის... როდესაც მან ფრანგი ფორვარდი "რეალში" მოიყვანა, გონსალო იგუაინი "ფარულ ნაღმზე" აღმოჩნდა, რადგანაც პიპიტა უდიდეს კონკურენციას განიცდიდა, მაგრამ მან ამ ყველაფერს გაუძლო და ძირითად შემადგენლობაში დაიმკვიდრა ადგილი. მიუხედავად ამისა პერესი მაინც თავის პოზიციაზე რჩება, მას ჯერაც აქვს იმის იმედი, რომ ჟოზე მოურინიო შეძლებს და ბენზემას თავისი საუკეთესო თვისებების წარმოჩენაში დაეხმარება... ჟოზე კი თავისმხრივ კვლავ ითხოვს ახალი ფორვარდის გადმობირებას. ზამთრის სატრანსფერო სეზონი ახლოვდება, ვნახოთ დათმობს თუ არა საკუთარ პრინციპებს ფლორენტინო პერესი.

ამჟამად ჟოზეს ფავორიტი ფერნანდო ლორენტეა, რომელიც ბილბაოს "ატლეტიკის" საუკეთესო ბომბარდირი და ამ ბასკური გუნდის უდავო ლიდერად ითვლება. ზაფხულის სატრანსფერო ბაზარზე ესპანელი თავდამსხმელის 'გამადრიდისტება' შესაძლებელი იყო, მაგრამ ამჟამად, ისედაც არასახარბიელო მდგომარეობაში მყოფი "ატლეტიკისთვის" გუნდის ლიდერის დათმობასთან დაკავშირებით საუბრები არალოგიკურია.

ყველაზე უარესი, რაც ამ სიტუაციაშია, არის ის, რომ ჟოზე მოურინიოს სიტყვები ახდა - გუნდს ახალი ფორვარდი სჭირდება. მადრიდის "რეალისთვის" ორი თავდამსხმელი ცოტაა. სამწუხაროდ, ნებით თუ უნებლიედ მადრიდის "რეალის" სამწვრთნელო, თუ სამმართველო შტაბის მთავარი კვანძი კვლავ კარიმ ბენზემაა...


By Kevlish...