ანჩელოტი:„როდრიგო საოცარ ფორმაშია, მოდრიჩმა დაზიანება მიიღო“
კარლო ანჩელოტიმ „კადისის“ დამარცხების შემდეგ პრესკონფერენცია გამართა...
„როდრიგო გოეშმა საოცარი თამაში ჩაატარა. ბრაზილიელი ბრწყინვალე ფორმაშია და დღევანდელ გამარჯვებაში უდიდესი წვლილი შეიტანა. ვამბობდი, რომ ის გოლების გატანას დაიწყებდა და ასეც მოხდა. რთული პერიოდი დაძლუელია, სამხრეთ-ამერიკელისგან კიდევ უფრო მეტს ველი.“
„ლუკა მოდრიჩს განსაკუთრებული დატვირთვა ჰქონდა. ვიმედოვნებ, სერიოზული არაფერია და მას მხოლოდ გადატვირთვა აქვს. ექიმების დასკვნას დაველოდებით და სიტუაციას შევაფასებთ.“
„ლუნინი მოწოდების სიმაღლეზე დგას. მიხარია, რომ უკრაინელმა კიპერმა კეპა არიზაბალაგა ბრწყინვალედ შეცვალა. „ნაპოლისთან“ მატჩში ანდრეის კვლავ მოუწევს მოედანზე გასვლა. კეპას დაბრუნება? თუ ყველაფერი გეგმის მიხედვით წარიმართება, ის „გრანადას“ წინააღმდეგ შეძლებს ჩვენს დახმარებას.“
„გუნდი ძალიან კარგი იყო. მოტივაციის პრობლემა ნამდვილად არ გვქონია. ვიცოდით, რომ უამრავი ტრავმის მიუხედავად, არსებული რესურსით გამარჯვება შეგვეძლო. საბედნიეროდ, ასეც მოხდა და 3 ქულა ჩავიწერეთ აქტივში.“
„რუდიგერსა და ალაბას შორის არჩევანი უნდა გამეკეთებინა. ჩავთვალე, რომ „კადისის“ სტილიდან გამომდინარე, დღეს მოედანზე გერმანელის გასვლა უმჯობესი იქნებოდა. ნაჩეტემ კარგად ივარჯიშა და დასვენებული იყო, სწორედ ამიტომ, მოედანზე აუცილებლად უნდა გასულიყო. ანტონიოს აუცილებლად დავასვენებ, მას მცირე რელაქსაცია ნამდვილად სჭირდება, რადგან საოცარ დატვირთვებს უძლებს.“
„ჩაბი ალონსოს განცხადება? მიხარია, რომ ჩემი ყოფილი შეგირდი მაფასებს. მისი სიტყვები ჩემთვის სასიამოვნო მოსასმენი იყო.“
„ბელინგემის მხარი სრულად აღდგენილი არ არის, ის სპეციალურ ვარჯიშებს გადის, მაგრამ თამაშში ხელი არ ეშლება.“
„ლა ლიგაში მომდევნო ტურები აუცილებლად უნდა მოვიგოთ. ვფიქრობ, შობამდე ყველა მატჩის მოგება შეგვიძლია, რაც სატურნირო მდგომარეობას მნიშვნელოვნად გაგვიუმჯობესებს.“
„დანი სებალიოსი დაბრუნდა, ამით ნახევარდაცვაში რესურსმა იმატა. ესპანელი თავს კარგად გრძნობს და ოპტიმალურ კონდიციაში მალე შევა. სებას ხშირად მიეცემა შანსი.“
„ბრაჰიმ დიასი სასტარტო შემადგენლობაში განიხილებოდა, მაგრამ კუჭის პრობლემის გამო, მისი მოედანზე გაყვანა რისკებს უკავშირდებოდა. როდრიგოს დასვენება გადავწყვიტე, რადგან დიდი დატვირთვა ჰქონდა მიღებული, თუმცა მას მოედანზე გასვლა მოუწია. საბედნიეროდ, გოეშმა საოცარი მატჩი ჩაატარა.“
- 26 ნოემბერი 2023
- 2525
- 4
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.
