მსოფლიოს ჩემპიონატის პარალელურად, ესპანეთის რანგით მესამე დივიზიონში (Primera RFEF Group 1) მე-12 ტურის მატჩები გაიმართა.

რაულის შეგირდებმა „ალფრედო დი სტეფანოზე“ „სან ფერნანდოს“ უმასპინძლეს და მიჯრით მეოთხე გამარჯვება ჩაიწერეს აქტივში. არიბასის დუბლის წყალობით, „კასტილიამ“ 2-0 დააფიქსირა ტაბლოზე. აღსანიშნავია, რომ სერხიომ 2 წუთში მოახერხა მოწინააღმდეგის თამაშიდან გამოთიშვა. მისი მეორე შედეგიანი დარტყმა განსაკუთრებით ლამაზი გამოვიდა. ახალგაზრდა მოთამაშე უკვე 7 გოლით იწონებს (პლიუს 3 ასისტი) თავს მიმდინარე სეზონში, რაც საუკეთესო შედეგია როგორც კლუბში, ასევე ჩემპიონატში.

ამრიგად, მადრიდელები უკვე 24 ქულას მოითვლიან და სატურნირო ცხრილში მე-4 პოზიციაზე არიან გამაგრებულნი. ისინი ლიდერ „კორდობას“ 5 ქულით ჩამორჩებიან.

„კასტილიას“ შემადგენლობა „სან ფერნანდოს“ წინააღმდეგ: კარილიო, რაფა მარინი, მარველი, ობრადორი (ა.ხიმენესი, 75'); ალვარო მ. (ტეო, 75'), მარიო დარტინი, დოკტორი; პეტერი (ედგარი, 85'), ალვარო (არანდა, 87') და არიბასი.
გოლები: 1-0, 2-0 არიბასი [42,' 45']