მბაპე:„გადაწყვეტილება ფულის გამო არ მიმიღია“
კილიან მბაპემ „მარკასთან“ ექსკლუზიური ინტერვიუ ჩაწერა, სადაც მიმდინარე მოვლენებთან დაკავშირებით ბევრ საინტერესო საკითხს გაუსვა ხაზი...
„მართლაც ფილმის ნაწილი მეგონა და ვერასდროს წარმოვიდგენდი, რომ ახალ კონტრაქტთან დაკავშირებით ქვეყნის პრეზიდენტიც კი დამირეკავდა. დიახ, ეს ჩემი გადაწყვეტილებაა, სხვების რჩევები კი ნამდვილად სასიკეთო იყო. დიახ, ეს ჩემი გადაწყვეტილებაა და ბედნიერი ვარ, რომ სამშობლოში დავრჩი. „პსჟ“-ს პროექტის ნაწილი ვიქნები და მჯერა, რომ წარმატებას ერთად მივაღწევთ.“
„თუ გინდა იყო დიდი ფეხბურთელი, მხოლოდ შენს გუნდზე უნდა იფიქრო და არა სხვა რამეზე. ახლა ჩემი ყურადღება მხოლოდ პარიზული გრანდის წარმატებაზეა მომართული. 1+1 ფორმატი? ეს შესაძლოა ესპანეთში ხდება, მაგრამ საფრანგეთში მსგავსი ხელშეკრულებები არ ფორმდება.“
„„ლივერპული“? დიახ, ამ კლუბიდან ინტერესი მოდიოდა. დედას ძალიან უყვარს ეს გუნდი და წითელი ფერი. რატომ? არ ვიცი, მას კითხეთ. საბოლოო ჯამში არჩევანი მადრიდის „რეალსა“ და „პსჟ“-ს შორის გავაკეთე. დიახ, გულწრფელად შემიძლია დაგიდასტუროთ, რომ შარშან „რეალში“ გადასვლა ძალიან მსურდა და გადაწყვეტილიც მქონდა, მაგრამ კლუბებს შორის შეთანხმება ვერ შედგა და მეც პარიზში დავრჩი.“
„სამეფო კლუბს დიდ წარმატებებს ვუსურვებ და ქომაგებს მადლობას ვუხდი, მე მათგან უდიდეს მხარდაჭერას ვგრძნობდი, რაც არასდროს დამავიწყდება. „ბლანკოსი“ ყოველთვის იქნება ჩემი ფავორიტი კლუბი და ყოველთვის გამიხარდება მადრიდელთა წარმატება.“
„არის თუ არა ჩემი ოცნება „რეალში“ თამაში? ვფიქრობ, ეს რომ ვთქვა „პსჟ“-ს უპატივცემულობა გამოვა, რადგან სულ ცოტა ხნის წინ ახალ კონტრაქტს მოვაწერე ხელი.“
„ახლა 3 წლიანი ხელშეკრულება მაქვს, არ ვიცი რა მოხდება მომავალში და მოვირგებ თუ არა სამეფო კლუბის მაისურს.“
„ალბათ ზოგიერთი მიიჩნევს, რომ სუპერვარსკვლავი ვარ და სხვანაირი ცხოვრება მაქვს, თუმცა ჩემი ნიჭი მხოლოდ მოედანზე რჩება, სხვა შემთხვევაში არაფრით ვარ განსხვავებული. მიყვარს ოჯახთან და მეგობრებთან ერთად ყოფნა და გართობა.“
„დიახ, მე ვიყავი მადრიდში, მაგრამ არა მოლაპარაკებებისთვის, არამედ აშრაფ ჰაკიმის თხოვნით. მაროკოელმა ესპანეთის დედაქალაქში ვიზიტი და დასვენება მთხოვა, მეც მისი თხოვნა შევასრულე, სხვა არაფერი. ბილეთში ჩემი სახელი და გვარიც კი არ იყო დაფიქსირებული, რათა აჟიოტაჟისგან აგვერიდებინა თავი.“
„ცოტა მოწყენილი ვარ, როდესაც მხოლოდ ფულზე საუბრობენ. არაერთხელ დამიმტკიცებია, რომ ჩემთვის მთავარი ფეხბურთია, ბევრი ტიტული, პროგრესი და კარიერული განვითარება. ჩემი ფული, ჩემი ფეხბურთია. შესაძლოა ჩემმა მშობლებმა და იურისტებმა თანხებზე ისაუბრეს როგორც „რეალთან“, ასევე „პსჟ“-სთან, მაგრამ მე ამაზე არასდროს მილაპარაკია და არც ვაპირებ. “
„ჩემი მიზანია ყველას ვაჩვენო, რომ საუკეთესო ფეხბურთის თამაში შემიძლია, ამას პარიზში აუცილებლად დავამტკიცებ.“
„უკვე მოვიგე მსოფლიო ჩემპიონატი და მჯერა, რომ ამას წელს კიდევ მოვახერხებ, თუმცა ახლა მთავარ მიზანს ჩემპიონთა ლიგის მოგება წარმოადგენს. არის თუ არა ეს აკვიატება? ეს დიდი მიზანი და ოცნებაა, რომელიც აუცილებლად უნდა ავისრულო.“
„ძალიან კარგად მესმის „რეალის“ ფეხბურთელების „სთორების“ შინაარსი, მაგრამ ამაზე სათქმელი არაფერი მაქვს. როდესაც ნაკრებში წავალ ბენზემას დეტალურად ავუხსნი, რატომ მივიღე მსგავსი გადაწყვეტილება.“
„იმისთვის, რომ იყო საუკეთესო, უნდა დაწერო ისტორია, მოიგო როგორც კოლექტიური, ასევე ინდივიდუალური ტიტულები და გაახარო ხალხი. ეს არ არის მხოლოდ გოლების გატანა და საგოლე გადაცემების გაკეთება, ეს რაღაც გლობალუირია, რაც საზოგადოებაში დიდ ემოციებს იწვევს.“
- 24 მაი 2022
- 5647
- 7
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.
