ანჩელოტი: „მისი შემცვლელი არ გვჭირდება!“
„ესპანიოლთან“ თამაშის წინ კარლო ანჩელოტიმ პრესკონფერენცია გამართა.
„ვიცით, რომ ახლოს ვართ ტიტულთან, მაგრამ ჯერ არაფერი დასრულებულა. ჩემპიონობისათვის 1 ქულის აღება გვმართებს.“
„რა შემიძლია ვთქვა მარსელოზე, მას ბევრ შეხვედრაში არ მიუღია მონაწილეობა, მაგრამ მაინც ფანტასტიკურ პროფესიონალად რჩება, სრულად გრძნობს და იზიარებს კაპიტნის პასუხისმგებლობას. ბრაზილიელი ყოველთვის თავდაუზოგავად მუშაობს და ეხმარება თანაგუნდელებს. არა მარტო ის, კიდევ არა ერთი მოთამაშე იმსახურებს მეტ სათამაშო დროს, თუმცა ასეთია ფეხბურთი. განაპირა მცველს დიდ პატივს ვცემ, როგორც სპორტსმენს და როგორც პიროვნებას. ვიმედოვნებ, მარსელო გახდება ყველაზე ტიტულოვანი ფეხბურთელი „რეალის“ ისტორიაში.“
„ცხადია, წინასწარ არ ვფიქრობთ ზეიმზე, ვინაიდან ჯერ არაფერი მოგვიგია. როდესაც დღის წესრიგში დადგება ამის საჭიროება, აუცილებლად აღვნიშნავთ ტიტულს.“
„მოთამაშეს შეუძლია დასვენება, მაგრამ თუ მწყობრშია და თავს კარგად გრძნობს, მოედანზე უნდა გამოვიდეს. ამ მომენტისათვის ჩვენი შემადგენლობის ბევრი წევრი შესანიშნავ ფიზიკურ კონდიციებშია. თუ ვინმეს არ შეუძლია ბურთაობა, ცხადია, სათადარიგოზე დავტოვებ.“
„დავიდე საკმაოდ კომპეტენტური ასისტენტია, რომელიც გამოირჩევა სერიოზულობით, პროფესიონალიზმითა და სიმშვიდით. ჩვენ გვყავს ახალგაზრდა და ენთუზიაზმით აღსავსე სამწვრთნელო შტაბი. ლოპისი, პინტუსი და ა.შ. ვცდილობ, მათი მონდომება და ჩემი გამოცდილება გავაერთიანო. რა თქმა უნდა, ოჯახური ურთიერთობიდან გამომდინარე, დავიდეზე საუბარი მიჭირს, მაგრამ ის აქ იმიტომ არ არის, რომ ჩემი შვილია. ვგონებ, შესანიშნავი დამრიგებელი გახდება სამომავლოდ.“
„ალაბას, მილიტაოსა და ნაჩოს არყოფნის გამო, დაცვით ხაზში პრობლემები გვაქვს. ძირითად შემადგენლობაში დავაყენებ ვალეხოს. მართალია, მისი სათამაშო პრაქტიკა მწირია, თუმცა ყოველთვის შრომისმოყვარეობით გამოირჩევა. ჯერ-ჯერობით არ ვიცი ვის შევუწყვილებ, შეიძლება ეს იყოს კაზემირო. ნახევარდაცვით ხაზში გაცილებით მეტი ვარიანტი არსებობს. ჩვენ გამარჯვებისთვის ვიასპარეზებთ და შესაბამისი შემადგენლობა გვჭირდება.“
„კაზემიროს შემცვლელი არ გვჭირდება. საყრდენის პოზიციაზე კროოსს, კამავინგასა და სებალიოსსაც შეუძლიათ თამაში.“
„ვეთანხმები იმ აზრს, რომ ფეხბურთი შეიცვალა. საკუთარ თავს ძველმოდურ მწვრთნელად არ მივიჩნევ. ზურგს სათანადო გამოცდილება მიმაგრებს და ფეხბურთთან ერთად განვიცდი ადაპტაციას. როდესაც პირველი ტიტული მოვიგე 20 წლის წინ, ცხადია, ის მესაჭე აღარ ვარ.“
„ალაბას ზუსტად ისეთივე პრობლემა აქვს, რაც „სიტისთან“ პირველ მატჩამდე. არსებული მომენტისათვის უცნობია მიიღებს თუ არა მონაწილეობას ოთხშაბათს გასამართ დაპირისპირებაში. ბოლო წუთამდე არაფერი იქნება ცნობილი.“
„ტიტულის მოგება ტოპ 5 ჩემპიონატში? სიმართლე გითხრათ, ჯერ მეხუთე არ მომიგია. ასე, რომ ამაზე ვერ ვისაუბრებ.“
„ცხადია, სეზონის სტარტზე ვერ ვიფიქრებდი ასეთ უპირატესობაზე მეტოქეებთან. გუნდმა დიდებულად იასპარაზა. ჩვენ ისეთ სტადიონებზე მოვახერხეთ გამარჯვების მოპოვება, როგორებიცაა: „სან მამესი,“ „ნოუ კამპი,“ „სანჩეს პისხუანი,“ „ანოეტა“ და ა.შ.“
„მბაპე 1005-ით „პსჟ“-ში რჩება? პრესკონფერენციის დროს მწვრთნელი ყოველთვის სიმართლეს ვერ ისაუბრებს, რაც ნორმალურია. ახლა მადრიდისტებს მხოლოდ 2 საფიქრალი აქვთ - გამარჯვება ხვალ და გამარჯვება ოთხშაბათს.“
„არ ვფიქრობ, რომ ხვალინდელ მატჩში მოთამაშეები მოდუნებულნი იქნებიან. „რეალს“ მხოლოდ 1 ქულა აშორებს ტიტულამდე და საქმე ბოლომდეა მისაყვანი.“
„გასახდელში მხოლოდ „ესპანიოლთან“ დაპირისპირებაზე მიდის საუბრები. „ეტიჰედის“ შემდეგ, მთლიანად პრიმერაზე ვართ გადართულნი. ჩვენს ხელშია „მატჩბოლი.““
„ჩვენს შეტევით ხაზს სრულად ვენდობი. კარიმი ფანტასტიკურ სამუშაოს ასრულებს. მისი დამსახურებით შედეგიანობის კოეფიციენტი მაღალია. ვინისიუსმაც დიდად გააუმჯობესა ასპარეზობა. ამასთანავე, ასენსიომაც არა ერთი შედეგიანი დარტყმა განახორციელა. იგივეს თქმა შეიძლება, ალაბაზე, მოდრიჩზე... თავდასხმა მოწოდების სიმაღლეზეა და ამაში პირველ რიგში ბენზემასა და ვინის მიუძღვით ლომის წვლილი. არ უნდა დაგვავიწყდეს არც როდრიგო, რომელიც ბევრი გოლით არ გამოირჩევა მიმდინარე სეზონში, თუმცა მნიშვნელოვანი გარდატეხის შეტანა შეუძლია.“
„შეგირდებს ხშირად ვესაუბრები. მათი აზრები ნიშანდობლივია, მაგრამ გადაწყვეტილებას მე ვიღებ. ნებისმიერ ფეხბურთელს რომ ჰკითხოთ, რა თქმა უნდა, გეტყვით, რომ თამაში უნდა. ბევრი ფაქტორია გასათვალისწინებელი.“
- 29 აპრილი 2022
- 3775
- 7
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.
