2002 წელს ჩემპიონთა ლიგის ჯგუფურ ეტაპზე ერთმანეთს მადრიდის რეალი და მილანი დაუპირისპირდნენ. რეალს რამდენიმე თვის წინ ჩემპიონთა ლიგა მოგებული ჰქონდა, მაგრამ მატჩის დაწყების წინ ეს მადრიდულ პუბლიკას არ ანაღვლებდა.

არცერთ რეალის ფეხბურთელს არ მიუღია ისეთი ხმამაღალი აპლოდისმენტები, როგორიც ფერნარდო რედონდომ. მატჩის შემდეგ კი ტრადიცია დაირღვა და სამხრეთის ტრიბუნასთან, გულშემატკივრებთან ერთად, რეალის კაპიტანი არ მისულა. რაულმა ულტრას სურთან ფერნანდო რედონდო მიაცილა, რეალის „პრინცი“, რომელიც უკვე მილანში თამაშობდა.

1994 წელს რეალის ისტორიაში საკმაოდ ცუდი პერიოდი იდგა. ბოლო 4 ლა ლიგის ტიტული ბარსელონამ მიისაკუთრა, რეალმა კი, ოთხწლიან პერიოდში, მხოლოდ 1 ესპანეთის სუპერთასის და 1 კოპა დელ რეის მოგება შეძლო.

ჩემპიონთა ლიგის ტიტული რეალს 1966 წლის შემდეგ არ ჰქონდა მოგებული, მადრიდული კლუბის მდგომარეობას კი ის ფაქტი აუარესებდა, რომ ბარსელონამ ლიგა 1992 წელს მოიგო, 94-ში კი ფინალი ითამაშა.

ფერნანდო რედონდო ტენერიფეში თამაშობდა, რომელიც ყველასთვის მოულოდნელად უეფას თასზე გავიდა. ამ ტურნირიდან გუნდმა ოსერისა და ოლიმპიაკოსის გამოგდება
მოახერხა, სანამ იუვენტუსთან დამარცხდებოდა. რედონდო, 93-94 წლებში, ტენერიფეს საუკეთესო ფეხბურთელად დასახელდა და რეალის ყურადღებაც მიიპყრო.



რედონდომ პირველივე წელს, რეალთან ერთად, ლა ლიგის ტიტული მოიგო და გუნდი ჩემპიონთა ლიგას დაუბრუნა. აღსანიშნავია, რომ ტურნირზე, იმ დროს, მხოლოდ ქვეყნის ჩემპიონები თამაშობდნენ.

ჩემპიონთა ლიგიდან ფერნანდო ისევ ტურინის იუვენტუსმა გამოაგდო, როგორც ტენერიფეში თამაშისას.

რეალმა ლა ლიგა 96-97 სეზონში კვლავ მოიგო, რედონდო კი გუნდის სეზონის საუკეთესო ფეხბურთელად დაასახელეს.

1998 წელს რეალი 17 წლიანი პაუზის შემდეგ პირველად ჩემპიონთა ლიგის ფინალში გავიდა, სადაც ტურინის იუვენტუსს შეხვდა. ეს რედონდოს მესამე შეხვედრა იყო იტალიურ კლუბთან, პირველ ორ შემთხვევაში არგენტინელი ფეხბურთელი დამარცხდა. იმ ღამით რედონდოს ბევრად უფრო რთული რამ ევალებოდა - პირად მეურვეობაზე ზინედინ ზიდანი უნდა აეყვანა.

1998 წელი ზიდანის კარიერაში საუკეთესო წელი იყო, მან სერია ა და მსოფლიო ჩემპიონატი მოიგო, მიიღო ოქროს ბურთი და მსოფლიოს საუკეთესო ფეხბურთელის წოდება. ამ წელს ზიზუს ვერავინ აჩერებდა, ვერავინ, გარდა ერთი კაცისა.

ფერნანდო რედონდომ ამ ფინალში ზიზუ პირწმინდად დაჯაბნა და ფრანგი ნახევარმცველისგან ყველანაირი ხიფათის განეიტრალება მოახერხა. რეალმა კარი მშრალად შეინახა და ფინალი ანგარიშით 1:0 მოიგო. რედონდო კი სეზონის სიმბოლურ ნაკრებში დელ პიეროს, ზიზუს და ლუიშ ფიგუს გვერდით დააყენეს. რედონდომ ორი წლის შემდეგ რეალთან ერთად კიდევ ერთი ჩემპიონთა ლიგა მოიგო. ამ დროს რეალის კაპიტანს, მანოლო სანჩისს, ტრავმა ჰქონდა, რის გამოც კაპიტნის სამკლაური სეზონის ბოლომდე რედონდოს ეკეთა.
მეოთხედფინალში საყრდენმა რეალის ისტორიაში ერთ-ერთი საუკეთესო პერფორმანსი შემოგვთავაზა, როცა იუნაიტედის მცველ, ჰენინგ ბერგს, საოცარი ფინტით გასცდა და რაულს ცარიელ კარში გაატანინა გოლი.



ფინალში ვალენსიას წინააღმდეგ რედონდო მატჩის საუკეთესო ფეხბურთლად დასახელდა, წლის ბოლოს კი საკლუბო სეზონის საუკეთესო ფეხბურთის ტიტულიც მოიგო.

ესპანურმა გამოცემა EFE-მ რედონდო ოთხმოცდაათიანი წლების საუკეთესო ფეხბურთლად დაასახელა.

2000 წელს რედონდო, რომელიც იმ დროს რეალის ვიცე კაპიტანი იყო, ფლორენტინო პერესმა გუნდიდან გაუშვა.

������� dle 10.1������� ������� ������