რას ნიშნავს თქვენთვის სამეფო კლუბი? - „რეალმა“ და Adidas Football-მა ახალი პროექტი წამოიწყეს.

ვარჯიშის დროს, ჟურნალისტი რომელიმე ფეხბურთელთან მიდის და ყურსასმენს აწვდის, სადაც ჩემპიონთა ლიგის განვლილ ფინალში გატანილი გოლების აუდიო ვერსიაა ჩაწერილი, ხოლო შემდეგ ეკითხება თუ რას ნიშნავს მისთვის „რეალის“ ფერების დაცვა.

იკერ კასილიასი: „ეს ყველაზე მნიშვნელოვანი მაისურია მსოფლიო ფეხბურთის ისტორიაში, რომლის ტარებაც დიდ პასუხისმგებლობას მოითხოვს.ყოველწლიურად მაქსიმუმი უნდა გაიღო, რათა შენი ასპარეზობა იყოს წარმატებული და გაახარო მადრიდისტები.“

„რა თქმა უნდა, ყოველი სეზონის წინ, ჩვენი მიზნები და ამოცანები უცვლელია.საბედნიეროდ, განვლილ საფეხბურთო წელს მოვახერხეთ ოცნების ასრულება.ჩემპიონთა ლიგის მოგებას 2002 წლის შემდეგ ვცდილობდით და ძალიან დიდი ზეწოლა იყო გუნდზე.„ლა დესიმას“ აღმართვა რთული გამოდგა.ვიმედოვნებ, რომ მიღწეულზე არ გავჩერდებით.ლისაბონიდან დაბრუნება და ტიტულის აღნიშვნა მეტად ემოციური იყო.“