თვით რაფაელ ბენიტესის მმართველობის დროსაც კი მადრიდის „რეალს“ ასეთი ცუდი შედეგი არ ჰქონია...

გარდა იმისა, რომ „ბლანკოსს“ უკვე 319 სათამაშო წუთის განმავლობაში გოლი არ გაუტანია, სხვა შედეგებიც კატასტროფულია, რომელიც ბოლო ათწლეულში არ დაფიქსირებულა.

სეზონის დაწყების შემდეგ 10 მატჩი ჩატარდა, სადაც „რეალმა“ მხოლოდ 17 გოლის გატანა შეძლო. 1.7 გოლი თითო მატჩში „ბლანკოსისთვის“ ძალიან ცუდი შედეგია. მსგავსი რამ 2008/09 წლების სეზონის შემდეგ არ მომხდარა.

აღსანიშნავია, რომ „ბლანკოსი“ გოლის გატანას 54 წუთში ერთხელ ახერხებს, როდესაც ზიზუს მმართველობის დროს 2016 წელს 33 წუთს ანდომებდა, 2017 წელს 31 წუთს, ხოლო 2018 წელს 37 წუთს.

ბოლო ათწლეულის საუკეთესო სეზონი 2011/12 წლებში დაფიქსირდა, როდესაც გუნდს მოურინიო წვრთნიდა და გუნდი თითო გოლის გატანას საშუალოდ 30 წუთს ანდომებდა. მაშინ „მერენგებმა“ ყველა ტურნირზე 174 გოლის გატანა შეძლეს.