კაზემირო:,,ყველაფერი ამოვწურე, რეალში უბედნიერესი ვიყავი"
კაზემირომ „რეალის“ ფეხბურთელის რანგში ბოლო პრესკონფერენცია გამართა...
„რას ვგრძნობ ახლა? მხოლოდ იმას, რომ ამაყი ვარ. 2013 წლის იანვრიდან მოყოლებული ჩემი ფიქრები მადრიდის „რეალზე“ იყო გადართული. ყველა მატჩში, ყველა ვარჯიშზე და ყველა სიტუაციაში „მერენგების“ გამარჯვებაზე ვოცნებობდი. მე აქ ბოლომდე დავიხარჯე და არ მახსენდება მომენტი, როდესაც მხოლოდ კლუბზე არ ვფიქრობდი.“
„ამ კლუბისთვის ყველაფერი გავეცი. როდესაც ჩემპიონთა ლიგა მოვიგეთ, აგენტს ვუთხარი, რომ ახალი გამოწვევა მჭირდებოდა, მან შვებულებაში გასვლა და დაფიქრება მირჩია. დაბრუნების შემდეგ აზრები არ შემიცვლია.“
„მსურს, მანჩესტერულ კლუბს აღორძინებაში დავეხმარო. აქ ყველაფერი მოვიგე, ყველაფერს მივაღწიე და ამისთვის ყველაფერი გავიღე. მადრიდის „რეალის“ წარმატებაში საკუთარი წვლილი მაქვს შეტანილი და ვეცდები, რომ პრემიერლიგაშიც იგივე გავაკეთო. გავეცნობით ინგლისურ ლიგას, კულტურას, ხალხს და ასე შემდეგ.“
„პრეზიდენტთან საუბარი ურთულესი იყო. ფლორენტინომ მხარდაჭერა აღმითქვა, რამაც მეტი შემართება მომცა. დიდი მადლობა ჩემს მეუღლეს, რომელმაც მითხრა, რომ ნებისმიერ გადაწყვეტილებას მიესალმებოდა.“
„მაქვს განცდა, რომ ჩემი ვალდებულება „რეალის“ მიმართ შესრულებულია. ლა ლიგასთან ერთად პრემიერლიგა ძალიან მიყვარს, სწორედ ამიტომ დავთანხმდი მანჩესტერული გრანდის წინადადებას.“
„„რეალი“ კვლავ გააგრძელებს ტიტულების მოგებას, ვინაიდან ეს ამ კოლექტივს ხასიათში აქვს. ინგლისიდან მადრიდულ გრანდს ვუქომაგებ და ფეხბურთელებთან ერთად აღვნიშნავ გოლებს, გამარჯვებებს, ტიტულებს. მე ვიცი, რომ აქაურობა ყოველთვის ძალიან მეყვარება.“
„ტონი კროოსმა ღამის 4 საათზე მომწერა მივდიოდი თუ არა, როგორც სჩანს ის ძალიან ნერვიულობდა, მე კი ვუპასუხე, რომ ღამე მაინც დავეძინებინე. ჩვენ ერთად უდიდესი ეპოქა შევქმენით, ამიტომ გულისწყვეტა გასაგებია.“
„„ბერმუდის სამკუთხედი“ დაიშალა, სწორედ ასე გვიწოდა ანჩელოტიმ ცოტა ხნის წინ. ტონი და ლუკა გუნდში რჩებიან, ისინი ამ კოლექტივის მამოძრავებელ ძალად განიხილებიან და მჯერა, რომ კიდევ დიდ წარმატებას მიაღწევენ.“
„დედამ მასწავლა, რომ არ არსებობს მთა, რომლის დალაშქვრაც არ შეიძლება, მთავარი მონდომება და შემართებაა. ჩემი ნება რომ იყოს, მანჩესტერელთა დახმარებას დღესვე დავთანხმდებოდი. ვიცი, რომ წინ დიდი გამოწვევები მაქვს. 18 წლის ბიჭივით ვარ და მჯერა, რომ მომდევნო წლებში აუცილებლად ვიბრძოლებ.“
„„რეალს“ ჰყავს ჩუამენი, კამავინგა და ვალვერდე. ეს უკანასკნელი შესაძლოა ჩემ პოზიციაზეც იხილოთ, თუმცა ფრანგებმაც დაამტკიცეს, რომ უდიდესი მომავალი აქვთ. საბედნიეროდ, მე არ ვარ მწვრთნელი და არჩევანის გაკეთება არ მიწევს, ეს საკმაოდ რთულია.“
„ჩემპიონთა ლიგაზე ვეღარ ვიასპარეზებ, მაგრამ ევროპის ლიგაზე ვეცდები წარმატების მიღწევას, რაც ავტომატურად ნიშნავს იმას, რომ 1 წლის შემდეგ ჩემპიონთა ლიგასაც დავუბრუნდები.“
„რონალდუს ხილვა ძალიან სასიამოვნო იქნება, მასთან ერთად ბურთის გაგოება ყოველთვის დიდი პატივი იყო, ის არის კერპი და ლეგენდარული ფიგურა.“
„როდესაც „რეალში“ თამაშობ, სახლში ყოველთვის ღიმილით ბრუნდები და სირთულეების გადალახვას მარტივად ახერხებ. ახლა მზად ვარ ახალი გამოწვევებისთვის და ვიცი, რომ 30 წლის ასაკში თავს ბრწყინვალედ ვგრძნობ. კარიერის დასრულებაზე ჯერ არ ვფიქრობ და წინ დიდი მიზნები მაქვს.“
„კრიშტიანოს ვნახავ და „რეალზე“ ვეტყვი რომ არაფერი შეცვლილა, ამ კლუბში მხოლოდ დრო გადის, მიდგომები კი იგივე რჩება.“
- 22 აგვისტო 2022
- 7031
- 28
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.
